Муома улууһун урбаанньыттара сыстыганнаах дьаҥ саҕаланыаҕыттан бэйэлэрин улуустарын балыыһаларыгар өрүү өйөбүл буолаллар.
edersaas.ru
Бүгүҥҥү күҥҥэ улуустааҕы терапия салаата сыстыганнаах дьаҥы бохсор сүрүн балыыһанан буолан турар. Манна провизорнай, изолятор уонна инфекционнай отделение бааллар. Эмчиттэр солбуһа сылдьан төгүрүк суукканы быһа коронавирус инфекциятын бохсор үлэни ыыталлар.
Улуустааҕы «Мин биисинэһим» киин салайааччыта Наталья Добрянцева оройуон дьаһалтатын пресс-киинигэр иһитиннэрбитинэн, бу күннэргэ улуус урбаанньыттара бу балыыһаҕа электрическэй прибордары, мыыла арааһын, хаһаайыстыбаннай тэриллэри, быһата, ыраастыыр- сууйар бары наадалааҕы барытын атыылаһан аҕалан туттардылар. Маны таһынан, урбаанньыттар кыттыһан, элбэх өҥөнү оҥорор орону атыылаһан биэрбиттэрэ. Бу тэрили изоляторга тутталлар.
— Маннык уустук кэмҥэ бу курдук бары бииргэ сомоҕолоһон, өйөһөн, бэйэ-бэйэбитигэр көмөлөстөхпүтүнэ эрэ сыстыганнаах дьаҥы кыайыахпыт, — диэн улуустааҕы балыыһа кылаабынай бырааһа Наталья Павлова урбаанньыттарга сүҥкэн көмөлөрүн иһин истиҥ махталын тиэрдэр.
Елена ПОТОЦКАЯ, «Саха сирэ» хаһыат», edersaas.ru
Хаартыска — «Муома улууһа» МТ дьаһалтатын саайтыттан.