Доруобуйа Сүрүн

Муома улууһа вакцинация былаанын 100% толорбут

Өрөспүүбүлүкэҕэ сорох улуустарга коронавируһунан ыалдьыы элбээн эрэр. Ол эрээри, уопсайынан ыллахха, ааспыт нэдиэлэҕэ күннэтэ 100-тэн тахсалыы киһи ыалдьар эбит буоллаҕына, билигин ортотунан 95-96 киһи ыалдьар. Онон кыра наматаһын баар курдук.

Дьокуускайга ортотунан 50-ча киһи күн аайы ыалдьара бэлиэтэнэр. Кэнники кэмҥэ Нам, Таатта, Уус Алдан улуустарыгар ыалдьыы ахсаана элбээн эрэр. Балыыһалар реанимацилыыр отделениеларыгар 84 киһи сытар, ол иһигэр 17 киһи олус ыарахан туруктаах, ИВЛ аппараатыгар холбоммуттар. Хомойуох иһин, күн аайы өлүү ахсаана намтаабат.

Өрөспүүбүлүкэтээҕи суһал ыстаап мунньаҕар Айсен Николаев быһыыны биэриини түргэтэтэр туһунан сорудахтаата. Үгүс улуустар былааннарын 50%-нын толорбуттар, арай Амма, Үөһээ Бүлүү, Нам, Таатта, Чурапчы улуустара намыһах көрдөрүүлээхтэр. Онон бу улуустарга күн аайы хонтуруол ыытыллыахтаах. Муома улууһа былаанын 100% толорбута бэлиэтэннэ. Былаан быһыытынан,  нэһилиэнньэ 60%-на вакцинаны ылыахтаах диэн сорук турар.

Оҕолор ыалдьыылара намтаан эрэр. Балыыһаҕа сытар ыарыһахтар 5%-ра уонна дьиэҕэ эмтэнээччилэр 19%-ра – оҕолор. Сайыҥҥы лааҕырдарга иккис, үһүс симиэнэлэр саҕаланнылар. Барыта 174 лааҕырга 6875 оҕо сылдьар.

Доруобуйа харыстабылын миниистирэ Елена Борисова иһитиннэрбитинэн, бу күннэргэ 2,5 тыһыынча устуука вакцина кэлэн, улуустарынан тарҕатыллыахтара.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru, СИА.

0
0