Муома хайаларыгар түспүт «Robinson» бөртөлүөт пилота бүгүн сибээскэ тахсыбата

Балаҕан ыйын 29 күнүгэр Муома улууһун хайаларыгар саахалланан түспүт «Robinson» бөртөлүөт пилотун көрдүү сарсын  8 чааска «Ми-8» бөртөлүөт көтүөҕэ диэн Муома улууһун баһылыга Иван Павлов биллэрбит. Кини этэринэн, сарсын сарсыарда бөртөлүөт түспүт сиригэр халлаан туруга көнүөхтээх. 

«Халлаан туругун кэтээн көрөөччүлэр этэллэринэн, бу күннэргэ буурҕа тохтуохтаах. Сарсын сарсыарда 8 чааска «Ми-8» бөртөлүөтүнэн быыһыыр сулууспа 10 үлэһитэ көтүө. Сарсын барыта быһаарыллыа дии саныыбын. Оптуорунньукка үс булчут тыаттан кэлээт, оҥостон баран «бураннарынан» пилоту көрдүү барбыттара. Кинилэр хайа биир өттүттэн саахал буолбут сиригэр тиийиэхтэрэ», — диэтэ Иван Павлов.

Муома диспетчердэрин сулууспата биллэрбитинэн, пилот быыһааччылары кытта бүгүн сибээскэ тахсыбатах. Бу иннинэ кини спутниковай төлөпүөнүнэн уонна GPS нөҥүө түспүт координаталарын ыыппыт эбит.

Санатан эттэххэ, балаҕан ыйын 29 күнүгэр Орто Халыматтан Уус Ньараҕа «Robinson» бөртөлүөтүнэн көппүт урбаанньыт саахалланан хайа быыһыгар  түспүт. Кини спутниковай төлөпүөнүнэн хайа быыһыгар баарын биллэрбит.

Николай Попов, «Саха сирэ» хаһыат, edersaas.ru