Муома улууһун борокуруора ааспыт сыл ахсынньы ыйыгар экология эйгэтигэр сокуону кэһиини сэрэтэр, булар уонна бохсор сыаллаах ведомстволар икки ардыларынааҕы оробуочай бөлөх мунньаҕын ыытта. Ол түмүгэр, кыылы-сүөлү сокуоннайа суохтук бултааһыҥҥа сыһыаннаах буруйдары булар үлэни күүһүрдэргэ диэн быһаарыы ылыммыттар. Бу туһунан Өрөспүүбүлүкэ Борокуратууратын пресс-сулууспата иһитиннэрдэ.
Вера МАКАРОВА, «Саха сирэ», https://edersaas.ru/
Ити быһаарыыларын толорон, Муома улууһун быраабы араҥаччылыыр уонна хонтуруоллуур уорганнара рейдэ ыыппыттар. Ол рейдэ кэмигэр «Буранынан» тайах сибиэһэй этин тиэйэн испит киһини туппуттар.
Бэрэбиэркэ быһаарбытынан, бу киһи тохсунньу 7 күнүгэр тайаҕы сокуоннайа суохтук өлөрбүт, ону ааһан СКС карабина регистрацията суоҕа биллибит.
Бу чахчынан РФ Холуобунай кодексатын 222-с ыст. 1 чааһынан (сааны сокуоннайа суохтук харайыы) уонна 258-с ыст. 1 чааһынан (сокуоннайа суохтук бултааһын) дьыала тэриллибит. Дьыаланы силиэстийэлээһин улуус борокуратууратын хонтуруолугар сылдьар.
Вера МАКАРОВА, «Саха сирэ», https://edersaas.ru/
Хаартыска: интернеттэн.