Бүгүн сарсыарда 10 ч. 30 мүн. Муоматааҕы «Баһаары утары судаарыстыбаннай сулууспаҕа» ахсынньы 22 күнүгэр Муома улууһун Чуумпу Кытылыттан Соболооххо диэри айаннаабыт 7 киһилээх «УАЗ-микроавтобус» сүппүтүн туһунан иһитиннэрии киирбит.
Александр Тарасов, «Саха сирэ» хаһыат, https://edersaas.ru/
Нэһилиэнньэлээх пууннар икки ардылара 150 км. Өр кэмҥэ сибээскэ тахсыбатахтарын иһин, баһаарынай сулууспаттан 4 киһилээх суһал биригээдэ тэриллэн, вездеход көлөнөн 11 ч 45 мүн көрдүү барбыт. Күнүс 13 ч 50 мүн Тихон өрүскэ массыыналара тааҥҥа түһэн турарын булбуттар. Иэдээҥҥэ түбэһэ сыспыт 7 киһи өрүстэн 5 км ыраах сытар сылгыһыттар учаастактарыгар тиийэн олороллорун булан, Соболооххо аҕалан биэрбиттэр. Дьолго, чугас сылгыһыттар учаастактара баар эбит. Тустаах тэрилтэ исписэлиистэрэ халлаан тымныытыгар тимир көлөлөөхтөр сэрэхтээхтик сылдьаргытыгар сүбэлииллэр.