Муомаҕа Обручев экспедициятын суолунан

Ааптар: 
Бөлөххө киир:

Быйыл Индигир өрүскэ экспедиция тэриллибитэ 95 сылын чэрчитинэн, атырдьах ыйын 24 күнүгэр  Муома улууһун Чуумпу Кытыл нэһилиэгэр историческай суолталаах тэрээһин хотуттан-соҕурууттан үгүс дьону түмтэ.

Бу туһунан Төбүлэхтэн Татьяна Кириллина иһитиннэрдэ:

— Биллиилээх геолог, ССРС Академияларын Наукаларын чилиэн-кэрэспэдьиэнэ, Сталин бириэмийэтин 1 степеннээх лауреата Сергей Обручев уонна Төбүлэх нэһилиэгэр бэйэтин кэмигэр ууһутунан аатыра сылдьыбыт, 1926 сыллаахха Индигир экспедициятын  сүрүн сирдьитинэн сылдьыспыт, Төбүлэх олохтооҕо  Дмитрий  Старков-Миичэкэ сырдык ааттарын үйэтитэр өйдөбүнньүк Мэҥэ таас арылынна.

Үөрүүлээх тэрээһини киирии тылынан Төбүлэх нэһилиэгин баһылыга Гаврил Соркомов арыйда. Манна даҕатан эттэххэ, бу өйдөбүнньүк бэлиэ муус устарга Санкт-Петербург куоракка  Нуучча географическай уопсастыбатын  ыҥырыытынан Гаврил Павловичка үөрүүлээх быһыыга-майгыга туттарыллыбыта. Нэһилиэк баһылыга  Дмитрий Старков хос сиэнигэр Марианна Хабароваҕа уонна хос-хос сиэнигэр А.В. Вожжовка Обручев айанын сырдатар өйдөбүнньүк кинигэни бэлэх уунна.

 Салгыы тэрээһиҥҥэ анаан кэлбит Санкт-Петербургтан оператор-фотограф, Нуучча географическай уопсастыбатын чилиэнэ, С. В. Обручев фондатын бэрэстэбиитэлэ А. Л. Мазур, Уус Ньараттан Д. Е. Старков-Миичэкэ хос сиэнэ Марианна Хабарова, Төбүлэх нэһилиэгин олохтооҕо, суоппар идэлээх, хос-хос сиэнэ А. В. Вожжов эҕэрдэлэрин тириэртилэр уонна бу  өйдөбүнньүк бэлиэни туруорууга кыттыбыт дьоҥҥо барҕа махтал тылларын эттилэр.

А.Л.Мазур «Обручев суолунан» экспедицияны  2017 сыллаахтан хайдах саҕалаабыттарын, туох үлэ барбытын мустубут дьоҥҥо сиһилии кэпсээтэ. Туруоруммут сыалын ситиһэригэр көмөлөспүт  баһылык Гаврил Соркомовка, нэһилиэк олохтоохторугар истиҥник махтанна.

Санкт-Петербург куораттан айанньыт С. В. Обручев кыыһа, Обручев аатынан фонда салайааччыта Татьяна Обручева уонна Дьокуускай куораттан ХИФУ ректорын Арктическай территориялар сайдыыларын боппуруостарыгар солбуйааччы, естественнэй наукалар экологияҕа географическай салаатын профессора, география билимин кандидата,  доцент Юрий Данилов куйаар нөҥүө эҕэрдэлэрин тиэртилэр, «Обручев суолунан» экспедиция үлэтин-хамнаһын, инники соруктарын сырдаттылар. Юрий Георгиевич салалтатынан 2019 сыллаахха «Обручев суолунан айан» саҕаламмытын, Обручев 1926 сыллааҕы экспедициятын суолун үөрэтии тохтооботун тоһоҕолоон  бэлиэтээтилэр. Салгыы нэһилиэк ытык кырдьаҕаһа Д.А. Шкулев сахалыы сиэринэн аал уоту оттон, сылгы сиэлинэн арчылаан, арыылаах алаадьынан, уохтаах кымыһынан айах тутта. Мустубут дьону олохтоох дьаһалта исписэлииһэ Дьулустаан Кудрин уонна электроыстаансыйа тутуутун салайааччыта Сергей Вагин ылбаҕай ырыанан эҕэрдэлээтилэр.

 Тэрээһини А.Ф.Старков аатынан Төбүлэх орто оскуолатын директора В.В. Васильев  иилээн-саҕалаан, салайан ыытта. Түмүккэ нэһилиэк аҕа баһылыга Гаврил Соркомов аҕыс туонналаах Мэҥэ тааһы аҕалан туруорууга кыттыспыт суоппардарга — А.В.Вожжовка, В.С. Хабаровка, нэһилиэк  ыччаттарыгар Е.Н. Егоровка, Т.Р. Хабаровка, П.И. Соркомовка, улахан кыамталаах тиэхиньикэнэн көмөлөспүт С.П. Вагиҥҥа барҕа махталын биллэрдэ.

Елена ПОТОЦКАЯ, «Саха сирэ» хаһыат. 

+1
0
+1
0
+1
0
+1
0
+1
0
+1
0
+1
0