Муома улууһугар бүгүн СӨ Бырабыыталыстыбатын ааспыт сыллаах үлэтин туһунан отчуота тэйиччиттэн ыытылла турар.
Хоту улуустарга үлэлээх буолуу – тыын боппуруос. Муома улууһун ааспыт сыллааҕы үлэтин түмүгүн көрдөххө, 2022 сыл тохсунньу 1 күнүнээҕи туругунан 66 киһи үлэтэ суох учуотугар турбут (бу көрдөрүү сыл анараа өттүгэр – 168). Ааспыт сылга Дьарыктаах буолуу киинигэр 212 киһи үлэ көрдөһө кэлэ сылдьыбытыттан 138 киһи үлэ миэстэтинэн хааччыллыбыт.
Улуус нэһилиэктэригэр – Чыыбаҕалаахха, Хатыҥ Арыыга үлэтэ суохтары сэлиэнньэни тупсаҕай оҥорууга, дьиэ таһын ыраастааһыҥҥа кытыннарбыттар. Хонууга үлэтэ суох сылдьыбыт киһиэхэ 150 тыһыынча солк. кээмэйдээх үп көрүллэн, бу киһи килиэби оҥорууга ылсыбыт.
Үлэтэ суох 2 киһини эбии үөрэхтээһин бырагырааматыгар олоҕуран электросварщик, косметик үөрэҕэр ыыппыттар. “Олохтоох каадырдары — бырамыысыланнаска” бырайыак чэрчитинэн 10 киһиэхэ үлэ булбуттар, ол иһигэр 8 киһи баахтаҕа уонна сезоннай үлэҕэ.
Ол эрээри Муомаҕа ааспыт сылга оҕо төрөөһүнэ аччаабыт (2020 с. – 68, 2021 с. тохсунньу-сэтинньи – 52). “Земский доктор” федеральнай бырагырааманан 2012-2021 сс. Муома улууһугар 14 быраас уонна 1 биэлсэр ыытыллыбыт, кинилэртэн былырыын 3 быраас уонна биэлсэр үлэлии тиийбит. Биэлсэр Буор Сыһыы ФАП үлэлиир.
Олох-дьаһах сорох көрдөрүүлэригэр тохтоотоххо итинник. СӨ Бырабыыталыстыбатын отчуота бара турар.
Бэлэмнээтэ Женни Стрюкова.
Хаартыска: интэриниэттэн (СИА архыыбыттан)