Улахан балык үрдүнэн муора кыырайар, ол быыһыгар саха киһитэ тыынан эрдинэр. Бу биһиги, сунтаардар, биир дойдулаахпыт Көстөкүүн Маамантап муоһунан уһаммыт оҥоһуга өбүгэ үгэһин, дьарыгын, итэҕэлин сэһэргиир. Ааттаах уус көмүс илиитинэн тыһыынчанан оҥоһук сүрэхтэнэр, кини анал уһуйуутунан сүүһүнэн муос кыһар идэлээхтэр тахсаллар. Мөркүүрүй уола билигин Арктика институтугар муоска уһуйааччынан үлэлиир. Кини үгүс оҕону бу эйгэҕэ үөрэтэн Саха сирин аатын ааттатар. Чулуу киһибитин кытта атах тэпсэн олорон элбэҕи да иһиттим.
Көстөкүүн Маамантап: “Муоһу кыһарынан үйэ аҥаарыттан тахса сыл үлэлээтим, билигин да үлэ барар. Оҕолору үөрэтэр олус үчүгэй, кэлэр кэскил ыччаппыт биһиги үлэбитин салҕааннар, элбэх айар үлэнэн дьарыгыран бэйэлэрин сайыннараллар уонна Саха сирин, Арассыыйаны көмүскүүр соруктаахтар. Биһиги Сахабыт сирэ олус баай, ону биһиги толору туһаммаппыт, ол да иһин бары оскуолаларга, орто, үрдүк үөрэхтэргэ хайаан да илиинэн уһанар үлэни элбэхтэ үөрэтиэххэ наада. Биһиги Арктическай институппутугар үөрэх кытаанах буолан баран, уруһуйдуур, пластилины таба туһанар буоллахтарына үөрэҕи баһылыахтарын сөп. Түөрт сыллаах, маны бүтэрдэхтэринэ үрдүк үөрэхтээх дьон буолаллар, онон кэлэн үөрэнэргитигэр ыҥырабын. Манна үөрэммит оҕолор сүрэхтээх, дьулуурдаах буоллахтарына барытын ситиһэллэр, олохторугар да олус туһалаах. Билигин ханна да бардахпына уһуйбут оҕолорум үөрэ-көтө көрсөллөрө, махталларын биллэрэллэрэ миэхэ улахан дьол. Сунтаар улууһуттан бу соторутааҕыта үс кыыс үөрэнэн бүтэрэн, олус айымньылаахтык үлэлии сылдьаллар. Билигин саха дьонугар баҕа санаам, искусствоны, оҥорон таһаарар үлэни баһылааҥ, оттон үөрэххэ киирэргэ сананар оҕолорго сүбэм, бастатан туран тус сыаллаах (целевой) миэстэҕэ направления ыытыаххытын наада, творческай эксээмэн уруһуй уонна пластилинынан арааһы оҥоруу. Ону кытта нуучча тылын уонна литературатын биир кэлим эксээмэнинэн туттаран киириэххитин сөп. Бу идэ хаһан баҕарар олус наада, эһигини аһатыан-таҥыннарыан сөп. Сунтаадар кытаатыҥ, үөрэххэ киирэн үөрэниҥ, кэтэһэбит”, — диэн күлэ-үөрэ сунтаардар кытаатыҥ диэн кэпсээнин түмүктээтэ.
Мария КОБЕЛЬЯНОВА – ТУСКУЛААНА, edersaas.ru сайтка анаан.