Кэбээйи улууһун биир бөдөҥ нэһилиэгэр, Мукучуга, 1 232 ынах сүөһү, ол иһигэр 415 ыанар ынах итиэннэ 438 сылгы, ол иһигэр 178 биэ баар.
– Үүнүү куһаҕана суох, дьоҕус хаһаайыстыбалар сүнньүнэн оттоон бүттүлэр, – диир нэһилиэк дьаһалтатын тыа хаһаайыстыбатыгар исписэлииһэ Марианна Гуляева. – Ол курдук, кэтэх ыаллар 2 730 туонна оту, Степан Гаврильев бааһынай хаһаайыстыбата 45 туонна оту чөкөттүлэр. Атырдьах ыйын ортотугар диэри халлаан туран биэрэн, үгүстэр отторун кыбыыларыгар тастылар.
- Үс ини-бии Кычкиннар уоппускаларыгар кэлэннэр, аҕаларыгар Алексей Семеновичка көмөлөһөн, оттоотулар уонна барытын кыбыыга тастылар
Оскуола 30 туоннаны оттуур былааннааҕыттан 22 туоннаны оттоото, «Сайылык» кэпэрэтиип 440 туоннаны кэбистэ. Көрдөрүүтэ өссө үчүгэй буолуоҕун, ардах мэһэйдээтэ. Бу кэпэрэтиип саамай бөдөҥ хаһаайыстыбабыт буолар, барыта 307 ынах сүөһүлээх, ол иһигэр 130 ыанар ынахтаах. Саас сенажка анаан 150 гектарга от ыспыта, мантан күһүн ону хомуйуохтаах. Онон былааммытын толорон, кыстыыр оппутун хааччыныахпыт диэн эрэнэбит.
Раиса Сибирякова.