СӨ тыатын хаһаайыстыбатын миниистирин бастакы солбуйааччы Татьяна Осипова бу күннэргэ Мухтуйа сиригэр, Ленскэй оройуонугар, тыа хаһаайыстыбатын туругун билистэ.
edersaas.ru.
Оройуон баһылыгын солбуйааччы Артем Артемьев ыалдьытын Орто Наахара нэһилиэгэр арыаллаан таһааран, дьаһалта баһылыга Евгений Саморцевы, тыа хаһаайыстыбатын исписэлииһэ Оксана Кусатованы, «Батамайдааҕы» ХЭУо генеральнай дириэктэрин э.т. Николай Ефимов-Владимировы кытары көрүһүннэрдэ.
Дьаһалта баһылыга нэһилиэккэ сүөһүнү-сылыгыны иитиигэ туох үлэ-хамнас ыытылларын билиһиннэрдэ. Инники өттүгэр бастатан туран, ыанар ынах ахсаанын элбэтэр, аныгы ирдэбилгэ сөп түбэһэр сүөһү иитэр комплексын тутар уонна быраҕыллыбыт ходуһалары чөлүгэр түһэрэр былааннанарын иһитиннэрдэ. Тоҕо диэтэххэ, миэстэҕэ оҥоһуллар, экология өттүнэн ыраас үүккэ уонна эккэ наадыйыы оройуоҥҥа даҕаны, ыаллыы Мииринэйгэ даҕаны олус үрдүк эбит.
Урукку сылларга “Ленскэй” сопхуоска таһаарыылаахтык үлэлээбит дьонтон үгүстэрэ бочуоттаах сынньалаҥҥа олороллор. Сорохторо билигин да үлэттэн илиилэрин араарбаттар, бэйэлэринэн үтүө холобур буолан, ыччаттары үлэҕэ-хамнаска үөрэтэллэр. Кинилэртэн биирдэстэрэ эдэркээн сааһыттан, 1979 сыллахтан, күн бүгүҥҥэ диэри тыраахтарын уруулун ыһыкта илик Юрий Иванович Федоров буолар. Татьяна Матвеевна кырдьаҕас мэхэньисээтэри анаан-минээн көрүстэ уонна АПК-ны сайыннарыыга өр сыллаах үтүө суобастаах үлэтин сыаналаан, «Саха Өрөспүүбүлүкэтин тыатын хаһаайыстыбатын бэтэрээнэ» бэлиэни туттарда.
Алексей Гуляев салайар бааһынай хаһаайыстыбата отут сүөһүнү, ол иһигэр 14 ыанар ынаҕы кыстатан турар. Алексей Егорович ыанньыгын ахсаанын элбэтэр, сүүс төбөҕө тиэрдэр санаалаах, онуоха оройуон дьаһалтата хотону кэҥэтиигэ көмөлөһүөх буолбут.
Татьяна Осипова салгыы Чамча бөһүөлэгэр сүөһүнү-сылгыны иитиигэ идэтийэр Валерий Прокопьев хаһаайыстыбатын үлэтин-хамнаһын билистэ диэн тыа хаһаайыстыбатын пресс-киинэ иһитиннэрэр.
Раиса Сибирякова, «Саха сирэ» хаһыат, edersaas.ru