Айылҕа харыстабыла Маны аах Тыа хаһаайыстыбата Уопсастыба

Мугудай дьоно-сэргэтэ биир дойдулаахтарыгар махталлара улахан

Мугудай нэһилиэгин олохтоохторо уот туруутун бохсууга бары биир санааҕа түмсэн, үлэлии-хамсыы сылдьаллар.

Нэһилиэк дьаһалтатын сүрүннүүр исписэлииһэ Илья Дмитриевич Сивцев атырдьах ыйын 13 күнүгэр билиһиннэрбитинэн, улуус нэһилиэктэриттэн, тэрилтэлэриттэн, уопсастыбаннай түмсүүлэртэн, Дьокуускайга олорор биир дойдулаахтарыттан, Мугудайтан төрүттээх  Дьокуускай куорат, Чурапчы нэһилиэгин түмсүүлэриттэн араас өрүттээх көмөлөр оҥоһулла тураллар. Ону тэҥэ, Саха Өрөспүүбүлүкэтин баһаары умуруорууга Доброволецтарын штаба ыксаллаах быһыыга-майгыга сүҥкэн көмөнү оҥороллор.

Ол курдук, М.Д Гуляев “Штиль” эрбиилэринэн, мэрия «Штиль» эрбиилэринэн уонна мотопомпаларынан, СӨ Мелиорациятын дьаһалтата 1 туонна уматыгынан, ууну ыстарар үрүксээктэринэн, И.В. Коротких мотопомпаларынан көмө оҥорбуттар. И.Н. Аммосов үбүнэн-харчынан көмөлөспүт, ону тэҥэ балаһыанньаны билсэ, сүбэлэһэ олорор. А.Д. Дьячковскай уоту утары туруулаһа сылдьар биир дойдулаахтарын этинэн-аһынан хааччыйбыт, А.Г. Макаров бэйэтин массыынатынан уу ыстаран, тус бэйэтэ үлэлэһэ сылдьар.

Ону тэҥэ «Туймаада-Нефть» тэрилтэтэ «Штиль» эрбиилэринэн, уматыгынан, улуус нэһилиэктэрин баһылыктара уматыгынан хааччыйбыттар, Кытаанах нэһилиэгин дьаһалтатын үлэһиттэрэ “Штиль” эрбиилэри ыыппыттар. “Чурапчы” ТХПК үлэһиттэрэ иһэр уунан, арыынан хааччыйбыттар. Оттон Чурапчы нэһилиэгин биирдиилээн олохтоохторо, “Аргыс” суоппар дьахталларын түмсүүлэрэ, улуус элбэх оҕолоох ийэлэрин түмсүүтэ, Төлөй, Хатылы нэһилиэктэрэ, олохтоох урбаанньыттар, “Маарыкчаан” ПО уо.д.а. тэрилтэлэр, ону таһынан биирдиилээн дьон быыстала суох аһы-үөлү, үлэҕэ туттуллар малы-салы тиэрдэ тураллар.

Билигин уоту умуруорууга нэһилиэктэн 100-тэн тахса киһи үлэлиир. Чыаппараттан бульдозер, уу таһар массыына, Чурапчытааҕы “Дьулуур” тэрилтэттэн “Беларусь” тыраахтар уонна уу таһар массыына, Мэҥэ Хаҥаластан баһаарынай массыына көмөҕө кэлэн, күнүстэри-түүннэри үлэлии сылдьаллар.

Онон ыксаллаах балаһыанньаҕа олорор Мугудай дьоно-сэргэтэ биир дойдулаахтарыгар махталлара улахан.

Анна ЗАХАРОВА

Хаартыска sanaoloh Инстаграмыттан

 

1
0