Бэлиитикэ Маны аах Сүрүн

Муҥутуур бэлэмнээх буолуу эрэсиимэ уһатылынна

Өрөспүүбүлүкэҕэ коронавирус дьаҥыттан муҥутуур бэлэмнээх буолуу эрэсиимэ ыам ыйын 31 күнүгэр диэри уһатылынна.

Саха сиригэр хоруона хамсыгын (COVID-19) бохсон, дьаҥы тарҕаппат туһуттан муҥутуур бэлэмнээх буолуу эрэсиимэ 2021 сыл ыам ыйын 31 күнүн киллэрэн туран, уһатылынна. Тустаах ыйаахха бэҕэһээ, муус устар 29 күнүгэр, СӨ Ил Дархана Айсен Николаев илии баттаата.
РФ Бырабыыталыстыбатын 2021 сыл кулун тутар 2 күнүнээҕи 300 №-дээх уурааҕынан ыам ыйын 1 күнүттэн күнүттэн, 65 саастарын туолбут уонна онтон үөһээ саастаахтарга дистанционнай көрүҥүнэн электроннай  больничнай лиис толоруллара тохтуур.

Итинэн сибээстээн бары үлэ биэрээччилэр 65-тэн үөһээ саастаахтар уонна олохсуйбут ыарыылаах, иммуносупрессиялаах үлэһиттэри дистанционнай эрэсииминэн үлэҕэ көһөрөллөрүгэр этиллэр. Оттон оннук кыаллыбат буоллаҕына сыллааҕы төлөнөр уоппускаларыгар эбэтэр үлэ сокуонугар сөп түбэһиннэрэн икки өртүттэн сөбүлэҥнээх төлөммөт уоппускаҕа ыыталларын туһунан этиллэр.

2021 сыл ыам ыйын 1 күнүттэн үлэлиир 65-тэн үөһээ саастаахтаахтарга, ону сэргэ дьарҕарбыт ыарыылаах, иммуносупрессиялаах дьоҥҥо бэйэни хааччахтанан олоруу эрэсиимэ тохтотуллар. Ол гынан баран, кинилэр үлэҕэ тахсалларыгар мааскалаах сылдьыахтаахтар. Бэлиэтээн эттэххэ, бэйэни хааччахтанан олоруу эрэсиимин уларытыы үлэлиир гражданнарга эрэ туһуланар. Оттон үлэлээбэт аҕам саастаахтар  уонна дьарҕарбыт ыарыылаахтар бэйэни хааччахтанан олоруу эрэсиимигэр ыам ыйын 31 күнүгэр диэри, ыам ыйын бүтэһик күнүн киллэрэн туран, олороллоро ирдэнэр.

Алта уон биэс саастарын ааспыт уонна дьарҕарбыт ыарыылаахтар үлэҕэ тахсалларыгар, ПЦР эбэтэр ИХА ньыматынан COVID-19 дьаҥын бэрэбиэркэлиир анаалыһы туттаралларыгар, үлэ биэрээччилэр бэйэлэрин суоттарыгар оҥоттороллор, анаалс түмүгэ үчүгэй буоллаҕына үлэлэтэллэр. Бу ирдэбил вакцинацияны ылбыттарга, коронавируһу утары иммунизация толору кууруһун барбыттарга туруоруллубат.

Итини сэргэ, үлэлиир 65 саастарын ааспыт гражданнар, ону сэргэ, дьарҕарбыт ыарыылаахтар, иммуносупрессиялаахтар үлэлэринэн командировкаларга барбаттар. Бу дьон үлэҕэ утарыта аһаҕастык сирэй көрсүһүүнү (хантаагы) тумналларыгар, төлөпүөнүнэн, электроннай көрүҥүнэн сибээһи туталларыгар, мунньахтарга, онтон да атын тэрээһиннэргэ видео сибээһинэн туһаналларыгар этиллэр. Маныаха хас 2-4 чаас ахсын дезинфекция оҥоһуллуохтааҕын уонна салгыны ыраастыыр тэрилинэн үлэлиир сир ыраастаныллыахтааҕын туһунан ыйыллар.

Өрөспүүбүлүкэ үрдүнэн үлэлиир түүҥҥү кулууптар, караоке-саалалар уонна да атын аралдьытар, сынньалаҥы тэрийэр сирдэр, атыы-тутуу аралдьытар кииннэригэр, атыы-эргиэн комплекстарыгар баар маннык сирдэр үлэлэрэ ыам ыйын 31 күнүн киллэрэн туран тохтотулларын туһунан этиллэр.

Ыйаах 2021 сыл ыам ыйын 1 күнүттэн күүһүгэр киирэр.

2021 сыл муус устар 29 күнүнээҕи 1842 №-дээх «О внесении изменений в отдельные правовые акты Главы Республики Саха (Якутия)» ыйааҕы сиһилии sakha.gov.ru  (здесь) киирэн билсиэххэ сөп.

0
0