Учуутал күнэ — норуот бырааһынньыга диэтэхпитинэ сыыспаппыт буолуо.
edersaas.ru
Бу истиҥ иһирэх күн киһи барыта үөрэппит учууталын эҕэрдэлиир. Сарсыардаттан үөрэппит оҕолоруттан эҕэрдэ бастыҥын тутар учууталларга бу бырааһынньык төрөөбүт күннэрин кэриэтэ сырдык уонна чаҕылхай буолара чахчы.
Мугудай орто оскуолатын 1980 с. «Олимпийскай выпуск» дэнэр выпускниктара «Тапталлаах учууталбытыгар — көмүс күһүн бэлэҕэ» диэн бэртээхэй үгэһи олохтообуттара быйыл үһүс сыла. Ол курдук, оскуоланы бүтэрбиттэрэ 38 сыл буолбут орто саастаах дьон (билигин бэйэлэрэ үлэ бэтэрээннэрэ, биэнсийэлээх дьон) нуучча тылын уонна литературатын үөрэппит ытыктыыр учууталларыгар Анна Барашковаҕа Учуутал күнүнэн сибиэһэй оҕуруот аһыттан, кыһыҥҥы хаһааска анаан кэнсиэрбэлээбит астарыттан-үөллэриттэн, араас отон барыанньатыттан, кылааһынан анаан хомуйбут сирдэрин аһыттан күндүлүүллэр эбит.
Кэрэхсэбиллээҕэ, нэһилиэктэргэ олорор хаһаайкалар учууталларыгар эрдэттэн астарын-үөллэрин хаһааналлар.
— Холобур, Төлөйгө олорор саамай оҕуруоччуппут куулунан хаппыыста, баһаам элбэх помидор киллэрэн, учууталбытын үөрдэр, — диэн кэпсиир киин куоракка олорор Екатерина Попова.
Ити курдук, сыл аайы Учуутал күнүгэр Анна Иннокентьевна эбиэт иннинэ үгэс быһыытынан чэйин оргутан, аһын астаан оҕолорун кэтэһэр. Эбиэт саҕана кини үөрэппит оҕолоро сибэкки дьөрбөтүн ууммутунан, кууллаах астарын туппутунан субу киирэн кэлэллэр.
Бэртээхэй холобур! Учууталы биир эрэ күн санаан ааспакка, сайыны быһа «Анна Иннокентьевнабын үөрдүөм» диэн толкуйдаах бэлэмнэммит бэлэх, ама, туохха тэҥнэһиэй?!
Елена ПОТОЦКАЯ, «Саха сирэ» хаһыат, edersaas.ru
Хаартыска Муҥудай орто оскуолатын 1980 с. «Олимпийскай выпуһун» архыыбыттан (2018 c).