Москваҕа Кыайыы 75 сылыгар анаммыт параат Дьокуускай бириэмэтинэн 16.00 чааска саҕаланна. 75 сыл анараа өттүгэр бэс ыйын 24 күнүгэр Кыайыы параада Кыһыл болуоссакка буолбута.
edersaas.ru
Преображенскай полка бочуоттаах караулун батальонун бөлөҕө Рейхстагка тэлээрбит Кыайыы Знамятын уонна Арассыыйа былааҕын таһаарда.
Киин трибунаҕа бэрэсидьиэн Владимир Путин, бэтэрээннэр уонна ыҥырыылаах ыалдьыттар турдулар. Абхазия бэрэсидьиэнэ Аслан Бжания, Белоруссия бэрэсидьиэнэ Александр Лукашенко, Казахстан бэрэсидьиэнэ Касым-Жомарт Токаев, Киргизия бэрэсидьиэнэ Сооронбай Жээнбеков, Молдавия бэрэсидьиэнэ Игорь Додон, Сербия бэрэсидьиэнэ Александр Вучич, Таджикистан бэрэсидьиэнэ Эмомали Рахмон, Узбекистан бэрэсидьиэнэ Шавкат Мирзиев, Соҕуруу Осетия бэрэсидьиэнэ Анатолий Бибилов кытыннылар.
Параады РФ Оборонатын миниистирэ, генерал Сергей Шойгу уонна генерал Олег Салюков хамаандалаатылар. Кинилэр байыаннайдар кэккэлэрин иннинэн кабриолеттарга олорон, сүүртүлэр. Миниистир бэрэсидьиэҥҥэ тиийэн, параакка бэлэм туһунан дакылааттаата.
Быйыл параакка 14 тыһыынча байыаннай сулууспалаах, 200 байыаннай тиэхиньикэ, 75 салгын аала кытыннылар. Аан бастакынан генерал-лейтенант аатынан Москватааҕы байыаннай музыкальнай училище барабанщиктарын роталара тахсан, параат тэтимин туттулар. Ол курдук, мүнүүтэҕэ 120 хардыыны оҥоруохтаахтар. Кинилэр кэннилэриттэн былаахтары, знамялары туппут бөлөхтөр хаамаллар.
Ону тэҥэ, 13 дойду (Армения, Азербайджан, Индия, Казахстан, Киргизия, Кытай, Молдавия, Монголия, Сербия, Таджикистан, Туркмения, Узбекистан) байыаннайдара эмиэ хаамтылар.
Быйыл Кыһыл болуоссакка байыаннай тиэхиньикэ 20 саҥа көрүҥэ кытынна. Холобур, “Тосочка” огнеметтары, ИСДМ ыраахтан миинэлиир систиэмэтин, “Курганец-25” БМП, “Панцирь-С1М” зенитнэй ракетнай комплексы, о.д.а. урут дьоҥҥо көрдөрө илик этилэр.
Аан бастаан Т-90 М уонна Т-80 БВМ тааҥкалар, БМП-2 пехота байыаннай массыыната, “Торнадо-С” реактивнай систиэмэ, “Тайфун-К”, “Тайфун-ВДВ” бронялаах массыыналар, “Витязь”, “Бук-М3” зенитнэй ракетнай систиэмэлэр, о.д.а. параакка кытыннылар.
Түмүккэ Арассыыйа салгын-космос күүстэрин 75 сөмөлүөтэ уонна бөртөлүөтэ 16 бөлөххө арахсан, көтөн күүгүнэттилэр. Бүтэһигэр Су-25 штурмовиктар бөлөхтөрө Кыһыл болуоссат үрдүнэн көтөн, Арассыыйа былааҕын үс өҥүн халлааҥҥа ойуулаатылар.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн.