Москва Тверскэй суута бэнидиэнньиккэ «Фэйсбугу» уонна «Инстаграмы» салайар Meta Platforms Inc. хампаанньаны экстремистскэй тэриллии диэн билиннэ уонна РФ сиригэр-уотугар үлэлиирин бопто. Бу туһунан «Российская газета» суруйар.
Маныаха бу хампаанньа пресс-сэкирэтээрэ Энди Стоун официальнай иһитиннэриитэ сылтаҕынан буолла. Стоун Украинаҕа буола турар быһыы-майгы туһунан информациялары ситимнэргэ тарҕатыы бобуллубатын туһунан эппитэ. Онон Арассыыйа олохтоохторун, ол иһигэр байыаннайдары саҥарыы, үөҕүү элбээбитэ.
Биэдэмистибэҕэ бэлиэтээбиттэринэн, ситимнэр салалталарын бу быһаарыныылара Арассыыйа олохтоохторугар куһаҕаннык дьайар. Онон Генпрокуратора Силиэстийэлиир кэмитиэккэ бу боппуруоһу быһаарарга сорудахтаабыта.
«Instagram» маассабай ыһыллыыга ыҥырар, байыаннай эпэрээссийэ туһунан сымыйа иһитиннэриилэри сотторботоҕо, онон кулун тутар 14 күнүгэр Арассыыйаҕа «блоктаммыта». Бу иннинэ «Facebook» ситимҥэ киирэр эмиэ хааччахтаммыта. РФ-га Meta бобуллуутугар WhatsApp киирсибэт, бу мессенджер үлэлиир.