Дойдубут тэбэр сүрэҕэр ахсынньы 14 күнүттэн саҕаланыахтаах Саха сирин күннэригэр өрөспүүбүлүкэ аатыттан атыы-эргиэн быыстапка-дьаарбаҥкатыгар 20 астыыр-үөллүүр тэрилтэ кытта барда. Кинилэр “Саха сиригэр оҥоһулунна” диэн бырайыак чэрчитинэн 24 туонна бородууксуйаны илдьэ тиийэн, Москва олохтоохторугар уонна ыалдьыттарыгар амсатыахтара, атыылыахтара.
Улахан тэрээһиҥҥэ “СахаАгроПродукт” ӨТХПХБК, “Чурапчы”, “Амма”, “Полюс холода” ТХПК-тэрэ уонна “Ягоды Якутии”, “Скиф”, “Байкал”, о.д.а. тэрилтэлэр кыттыахтара. Холобур, «Амма» кэпэрэтииптэн бэрэссэдээтэл Айысен Черноградскай салалтатынан үс киһи 800 киилэ ыйааһыннаах аһы-үөлү илдьэ бардылар. «Өссө элбэҕи ылыахпытын сөмөлүөккэ төлөбүрэ ыараханыттан иҥнэбит», – диир Айысен Анатольевич. Амма асчыттара быйыл Москва «Көмүс күһүн» быыстапка-дьаарбаҥкатыгар кыттаннар, үс кыһыл көмүс мэтээли ылбыттара. Бу сырыыга сырдарын өссө күүскэ рекламалыыр санаалаахтар.
«Саха сиригэр оҥоһулунна» бырайыактаах өрөспүүбүлүкэ атыынан-эргиэнинэн муҥурданыа суоҕа. Саха сирэ Россия судаарыстыбатыгар киирбитэ 385 сылынан ыытыллар күннэр кэмнэригэр дьыалабыай көрсүһүүлэргэ сүүрбэччэ сөбүлэһии түһэрсиллэрэ былааннанар. Ол иһигэр СӨ бырабыыталыстыбатын бэрэссэдээтэлин бастакы солбуйааччы-тыа хаһаайыстыбатын уонна ас-үөл бэлиитикэтин миниистирэ Петр Алексеев ахсынньы 15 күнүгэр Москва куорат эргиэҥҥэ уонна өҥөҕө департаменын салайааччыта Алексей Немерюктуун ас-үөл эйгэтигэр бииргэ үлэлиир туһунан сөбүлэһиигэ илии баттыахтара. Оччотугар Саха сирин этэ-балыга эрэйин төлөтөр сыанаҕа дьэ турар ини.
Василий НИКИФОРОВ, «Саха сирэ» хаһыат, edersaas.ru