Москва наркологтара: “Саха сирин уопутун ылына кэллибит”

25.05.2017
Бөлөххө киир:

Дьокуускайга Москва Доруобуйа харыстабылын департаменын наркологияҕа научнай-практическай киинин бэрэстэбиитэлэ, Наркологическай ыарыылары сэрэтэр киин салайааччыта Елена Деменко, эмиэ бу киин научнай үлэһитэ, психологическай наука доктора, профессор, психиатр-нарколог Виктория Аршинова Саха сирин арыгыны утары охсуһар уопутун үллэстэ кэллилэр.
Ангелина Васильева, “Саха сирэ” хаһыат, edersaas.ru

Бэҕэһээ кинилэр чөл олох, уһун үйэлээх буолуу боппуруостарыгар Ил Дархан иһинэн Сүрүннүүр сэбиэт мунньаҕар кыттыыны ыллылар. Мунньаҕы вице-премьер Михаил Гуляев салайан ыытта.
Манна Москва Доруобуйа харыстабылын департаменын наркологияҕа научнай-практическай киинин кытта бииргэ үлэлэһии, арыгыны утары сэрэтэр үлэ, арыгыһыттары эмтиир, итирик дьону харайар тэрилтэни (медвытрезвитель) тэрийии, о.д.а. боппуруостары тула кэпсэтии барда.

Михаил Гуляев арыгыны иһиини аҕыйатарга туһуламмыт миэрэлэр тустарынан кэпсээтэ. Кини этэринэн, арыгыны атыылыыр маҕаһыын ахсаана 1500-тэн 862-гэ диэри аҕыйаабыт. Кэнники 6 сылга өлөрүү ахсаана 21%, доруобуйаны ыараханнык эмсэҕэлэтии 44 %, ороспуойдааһын, халааһын 70%, арыгыттан өлбүт дьон ахсаана 48% аҕыйаабыт. Билиҥҥи туругунан, 142 нэһилиэк арыгы атыытыттан аккаастанна.

Өрөспүүбүлүкэтээҕи наркологическай диспансер кылаабынай бырааһа, Доруобуйа харыстабылын министиэристибэтин кылаабынай нарколога Петр Тумусов ыарахан туруктаах дьону эмтииртэн сэрэтэр үлэҕэ көһүү баарын бэлиэтээтэ. “Үгүс киһи “култуурунайдык иһэбит” диэн ааттаан, элбэхтик иһэр эрээри, биһиэхэ кэлбэттэр, учуокка турбаттар. Араас буруйу бу дьон оҥороллор. Биһиэхэ иккис стадияҕа тиийбит дьон кэлэр”, — диэтэ. Онон сибээстээн, кини учаастак быраастарын сэрэтэр үлэлэрин күүһүрдэр, анаан үөрэтэр наадалааҕын ыйда. Мединститукка наркология кафедрата суоҕун, терапевтарга семинардары ыытар наадалааҕын эттэ.
Оттон ХИФУ медицинскэй институтун дириэктэрэ Николай Гоголев наркологияҕа ординатура арыллан эрэрин иһитиннэрдэ.
Доруобуйа харыстабылын миниистирин слбуйааччы Людмила Вербицкая медвытрезвителлэр боппуруостарын көтөхтө. 2011 сылтан медвытрезвителлэри дойду үрдүнэн сабаттаан кэбиспиттэрэ. Боломуочуйаны медицинскэй тэрилтэлэргэ биэрбиттэрэ.
Михаил Гуляев бу боппуруоһу бэс ыйын 15 күнүгэр диэри быһаарарга Доруобуйа харыстабылын уонна Үлэ, социальнай көмүскэл министиэристибэлэригэр сорудах биэрдэ. Ону тэҥэ, мединститукка арыгыны сэрэтэр үлэҕэ бэлэмниир куурустары ыытарга сорудахтаата.

Оттон Елена Деменко Арассыыйа кылаабынай нарколога Евгений Брюн Егор Борисовка туһаайыытын ааҕан иһитиннэрдэ. Брюн өрөспүүбүлүкэҕэ арыгыттан сылтаан өлүү аҕыйаабытын бэлиэтээн, Уһук Илин регионугар чөл олох хамсааһынын таһаарбыттарыгар махтаммыт.
Биһиги РФ кылаабынай наркологун сорудаҕынан Саха сирин уопутун ылына, көрө-истэ кэллибит. Маннык ыарахан, тыйыс усулуобуйаҕа олорон эрэн, алдьатыылаах дьаат тарҕаныытын утары көдьүүстээх миэрэлэри ылынаргытын, култуураҕа, искусствоҕа, спорка ситиһиилэргитин сөҕөбүт, киэн туттабыт. Саха сирин уопутун Арассыыйа үрдүнэн тарҕатыахпыт”, — диэн Елена Деменко эттэ.


Москва наркологтара мунньах кэнниттэн Хаҥалас улууһун Өктөм нэһилиэгэр тахсан үлэлээтилэр, СӨ бастакы бэрэсидьиэнэ Михаил Николаев мусуойугар сырыттылар. Сарсын Дьокуускайга психоактивнай веществолары утары хайдах үлэлэһэргэ үөрэтэр кууруһу уонна босхо тренинг-семинары ыытыахтара.

Ангелина Васильева, “Саха сирэ” хаһыат, edersaas.ru

Ааптар уонна Айаал Черноградскай түһэриилэрэ.

+1
0
+1
0
+1
0
+1
0
+1
0
+1
0
+1
0