Москваҕа «Уһук Илиҥҥи экспресс» айана саҕаланна

Ааптар: 
Бөлөххө киир:

Москваҕа «Уһук Илиҥҥи экспресс»  айана саҕаланна.

Сэтинньи 9 күнүттэн «Уһук Илиҥҥи экспресс» төрдүс төгүлүн айанныыр. Эрэгийиэннэр бэлиэлэрэ дьон-сэргэ болҕомтотун тардар. Биир вагон Саха сиригэр ананар. Алта ый устата, 2022 сыл ыам ыйын 1 күнүгэр диэри, пуойас Москва метротунан Арбатско-Покровскай салаанан айанныа.
«Москва олохтоохторо уонна ыалдьыттара биһирээбит бырайыактара 2017 сыллаахха Арассыыйа Бэрэсидьиэнин Уһук Илин федеральнай уокуругар боломуочуйалаах бэрэстэбиитэлэ Юрий Трутнев көҕүлээһининэн саҕаламмыта итиэннэ үтүө үгэскэ кубулуйда. Өскөтүн эһиги Саха сиригэр анаммыт вагоҥҥа киирдэххитинэ, Олоҥхо дойдутун баай историятын, култууратын, үгэһин, ураты айылҕатын, бэлиэ сирдэрин туһунан билиэххит», — диир Ил Дархан Айсен Николаев.
Быйыл вагоҥҥа кэрэ айылҕа, кыыл-сүөл, тымныы хаһаайына Чысхаан, САССР 100 сылын бэлиэтэ, о.д.а. ойуулар киллэриллибиттэрэ болҕомтону тардыахтара. М.К.Аммосовка туспа истиэндэ ананна. Хас биирдии вагоҥҥа иккилии эрэгийиэн киирэр. Саха сирэ Амур уобалаһын кытары бииргэ бааллар.
«Саха сиригэр кэнники кэмҥэ кыһыҥҥы тымныыны билэр-көрөр баҕалаах дьулуһар айанньыттар элбээтилэр. Мин санаабар, бу пуойаһы Москва олохтоохторо долгуйа күүтэллэр, тоҕо диэтэххэ вагоннар олус интэриэһинэй иһитиннэриилэри, билиини-көрүүнү биэрэллэр. Саха АССР 100, Саха сирэ Арассыыйа судаарыстыбатыгар холбоспута 390, автономияны турууласпыт бэлитиичэскэй диэйэтэл Максим Аммосов төрөөбүтэ 125 сылларын көрсө билиини-көрүүнү дьоҥҥо иһитиннэрии улахан болҕомтону тардыа», — диир РФ Бэрэсидьиэнигэр СӨ Бастайааннай бэрэстэбиитэлэ  Андрей Сандаминович Федотов.
Уһук Илиҥҥи экспресскэ, ураты «Единэй» билиэттэр уонна «Тройка» каарталар Уһук Илиҥҥи эрэгийиэннэр күннэринэн презентацияланаллар.
+1
0
+1
0
+1
0
+1
0
+1
0
+1
0
+1
0