Омуктар дьыалаларыгар Федеральнай ааҕыныстыба тэрийиитинэн, Москваҕа, сэтинньи 16 күнүгэр “Языковая политика: общероссийская экспертиза” форум ыытыллар. Бу туһунан Тас сибээскэ уонна норуоттар дьыалаларыгар СӨ министиэристибэтэ иһитиннэрдэ.
Дьоһун суолталаах мунньах Ильинка уулуссатыгар турар историческай дьиэҕэ былааннаммыт. Түһүлгэҕэ тыл үөрэҕин эспиэрдэрэ, филолог учуонайдар, Арассыыйа норуоттарын тылларын, нуучча тылын преподавателлэрэ, былаас уорганнарын салайааччылара мусталлар. Кинилэр РФ субъектарыгар, Арассыыйа норуоттарын тылларын конституционнай статуһугар тыл туругун учуоттуур, үөрэҕи тэрийэр, дойдубут норуоттарын тылларын сайыннарар, харыстыыр, сөптөөх, табыгастаах усулуобуйаны тэрийэргэ туһуламмыт этиилэрдээх мустан кэпсэтиэхтээхтэр, санааларын үллэстиэхтээхтэр.
Пленарнай мунньахха мустубут ыалдьыттар “Русский язык как инструмент надэтнической консолидации общества”, “Родные языки народов России в контексте общероссийского языкового пространства” уонна РФ субъектарын толорор былааһын уорганнарын салалталарыгар, исписэлиистэригэр “Актуальные вопросы языковой политики” диэн секцияларынан үлэлэргэ кытталлар.
Сэргээбиттэр норуоттар дьыалаларыгар Федеральнай ааҕыныстыба саайтыгар: http://fadn.gov.ru киирэн көрүөххүтүн сөп.