Ааспыт нэдиэлэни толору П.А.Ойуунускай аатынан Саха академическай тыйаатырыгар Москватааҕы М.С.Щепкин аатынан Үрдүкү театральнай училищеҕа (институкка) үөрэххэ ылар хамыыһыйа үлэлээтэ.
Бүтэһик күнүгэр диэри саҥаттан-саҥа оҕолор кэлэ турбуттара, онон, бастакы түһүмэххэ 70 сайаапка киирбитэ биллэр эбит буоллаҕына, түмүккэ артыыс буолуон баҕалаах ахсаана 100-кэ тиийбитэ.
Дьэ бу 100 эдэр киһиттэн хас эмэ түһүмэхтээх тургутан көрүү кэнниттэн 21 ыччат талылынна. Кинилэртэн 14 – федеральнай бүддьүөттэн үбүлэнэр, 6 миэстэни өрөспүүбүлүкэ уйунар уонна 1 абитуриент төлөбүрдээх үөрэххэ ылылынна. Төлөбүрдээх үөрэххэ, үгэс быһыытынан, иккис үрдүк үөрэххэ киирбиттэр ылыллаллар.
—Хас эмэ сылы быһа туруорсан, быйыл, Арассыыйаҕа Тыйаатыр сылыгар, дьэ, бэйэбит үөрэммит кыһабытыттан, “щепкины” кытта сибээспитин мэлдьи тутуһабыт, Саха сиригэр анаан бүддьүөт миэстэлэрэ кэллилэр. Ыччаттары кытта билсистибит. Таһым да, тас көрүҥ да баар. Ол эрээри, БКЭ бааллара тиийбэт буолан, үгүстэри ол атахтаата. Нуучча тылыгар — 55, литературатыгар — 44 буолуохтаах. Үөрэххэ ылыллар баал саамай алын кээмэйэ оннук. Төһө эмэ кыһыны быһа, БКЭ-ҕитин кытаатыҥ, диэн этэ сатаабыппыт. Онон, хаарыан талааннаах 6-7 оҕо, чахчы киһи харыһыйар ыччаттара, кыһыылаах баҕайы — бааллара кыра буолан, төнүннүлэр.., — диир Саха тыйаатырын дириэктэрэ Анатолий Николаев.
Мин иккис түһүмэххэ түбэһэн, артыыс буолар баҕалаах оҕолору көрө-истэ түспүтүм. 39 оҕо хаалбыт этэ. Бары кэриэтэ үчүгэйдик ыллыыллара, сахалыы кылыһахтаах куоластаахтара, бэркэ хоһоон ааҕаллара, сөпкө тутталлара-хапталлара тута харахха быраҕыллар. Үгүстэр хомуска, баяҥҥа, гитараҕа, онтон да атын мусукаалынай инструменнарга оонньууллар. Үчүгэйдик үҥкүүлүүллэр. Спортсменнар да суох буолбатахтар. Хас да оҕо Култуура уонна искусство кэллиэһин бүтэрбит.
Аны соһуччу, “сахалыы билбэппин, саҥарбаппын, үөрэтиэм буоллаҕа”, диир сорох ыччат эмиэ туттарса кэлбитэ дьиибэргэттэ…
Биллэн турар, үөрэххэ ылыыга быһаарар куолаһы Москваттан анаан-минээн кэлбит хамыыһыйа ылар: Наталья Макарова – М.С. Щепкин аатынан Үрдүкү театральнай училище сценическэй саҥаҕа кафедратын бэрэпиэссэрэ, Башкортостан искусствотын үтүөлээх диэйэтэлэ, Валентин Афонин – актер маастарыстыбатын кафедратын бэрэпиэссэрэ, Удмуртия үтүөлээх артыыһа, Аля Кизилова – бэйэтэ 2014 сыллаахха “Щепкини” бүтэрбит, ити сыл Малай академическай тыйаатыр бастыҥ артыыһа, Арассыыйа норуодунай артыыһа, театральнай педагог, бэрэпиэссэр Борис Клюев (саха устуудьуйатын чуолаан кини салайбыта) бөлөҕөр үлэлии кэлбит.
Хамыыһыйа чилиэннэрэ хас биирдии абитуриены кытта бэрт эйэҕэстик кэпсэтэллэр, эйэ-дэмнээхтик, хантан сылдьарын, тоҕо артыыс буолуон баҕарарын, сахалыы-нууччалыы үгэни билэрин-билбэтин, хас бииргэ төрөөбүттэрин, төрөппүттэрэ туох үлэһиттэрин, о.д.а. араас ыйытыылары биэрэллэр.
Хамыыһыйаҕа (көннөрү, саҥа көлүөнэни көрөөрү, интэриэһиргээн да кэлбиттэр бааллар быһыылаах), уопсайынан бу күннэргэ
тыйаатырга “бэйэбит дьоммут”, араас сылларга “Щепкины” бүтэрбит биллиилээх артыыстарбыт, режиссердарбыт — Андрей Борисов, Лена Сергеева, Руслан Тараховскай, Юрий Макаров, Петр Скрябин, Иза Николаева, Софья Баранова, уо.д.а. бааллара көстөр.
Мин истэрбэр, кими даҕаны эн аныгыс түһүмэххэ кэлимээр диэбэтэхтэрэ. Холобур, кыргыттары барыларын – сарсын былааччыйалаах, хобулуктаах түүппүлэлээх кэлээр, диэн испиттэрэ. Сорохторго, “баттаххын үөһээ хомуйаар, оччоҕуна моонньуҥ уһуна көстүөҕэ, кулгааххын эмиэ көрүөхпүтүн наада…”, — диэн сүбэлээбиттэрэ.
Ол да буоллар, хайа эрэ түһүмэххэ сыыйылланнар, саамай түмүккэ уопсайа 21 оҕо хаалбыт. Мантан биир уол төлөбүрдээххэ киирбит. Онон, 13 уол уонна 7 кыыс артыыс үөрэҕэр, бүддьүөт миэстэтигэр, киирэр дьоллоннулар.
Иккис түһүмэххэ түбэһэн көрбүппүттэн, син элбэх оҕоттон Нарыйа уонна Аида диэн кыргыттары итиэннэ Антон диэн уолу, испэр, арааһа, киирэллэрэ буолуо диэн, сөпкө таайбыт эбиппин…
— Бу оҕолор аны 4 сылынан үөрэхтэрин бүтэрэн, Саха сирин тыйаатырдарыгар кэлэн үлэлиэхтэрэ. Москва диэн – Москва! Оҕолор дойдуларыгар кэлэллэригэр талааннара өссө арыллыаҕа, сайдыахтара, тыыллан-хабыллан тахсыахтара. Биһиги тыйаатырдарбытыгар саҥа сүүрээни киллэриэхтэрэ!, — диэтэ Анатолий Павлович.
Татьяна МАРКОВА.
Дьэ, онон, 6-с устуудьуйаны билсиэҕиҥ:
Саша Белолюбская, Амма улууһа, Абаҕа с., А.Е.Кралин аатынан Абаҕа орто оскуолатын бүтэрбит
Антон Винокуров, Үөһээ Бүлүү улууһа, Хоро с. СӨ Култуура уонна искусство кэллиэһин бүтэрбит
Женя Григорьев, Ньурба к., С.Васильев аатынан Ньурба орто оскуолатын бүтэрбит
Петр Домотов, Уус Алдан улууһа, Уһун Күөл с. Аллараа Бэстээхтээҕи транспортнай техникуму бүтэрбит
Володя Дормидонтов, Сунтаар улууһа, Агдары с., Ленскэй к. 2 N-дээх орто оскуолатын бүтэрбит
Аида Еремеева, Сунтаар улууһун Дьаархан с., Г.Г.Игнатьев аатынан Дьаархан орто оскуолатын бүтэрбит
Саша Захаров, Мэҥэ Хаҥалас улууһа, Хорообут с., СӨ Култуура уонна искусство кэллиэһин бүтэрбит
Айаал Иванов, Үөһээ Бүлүү с., Дьокуускайдааҕы промышленнай техникуму бүтэрбит
Гриша Иванов, Дьокуускай к., Автодорожнай техникуму бүтэрбит
Ваня Кузьмин, Сунтаар улууһун Дьаархан с., М.К.Аммосов аатынан ХИФУ-ну бүтэрбит (төлөбүрдээх үөрэх)
Ньургун Никитин, Дьокуускай к., 1N-дээх орто оскуоланы бүтэрбит
Алена Пономарева, Дьокуускай к., 38N-дээх орто оскуоланы бүтэрбит
Вася Романов, Мэҥэ Хаҥалас улууһун Бэдьимэ с., Бэдьимэ орто оскуолатын бүтэрбит
Юлия Санникова, Мэҥэ Хаҥалас улууһун Табаҕа с., Р.А.Бурнашов аатынан Табаҕа орто оскуолатын бүтэрбит
Уйгу Семенов, Өлөөн улууһун Дьилиҥдэ с., СӨ Култуура уонна искусство кэллиэһин бүтэрбит
Настя Скрябина, Нерюнгри куорат 13N-дээх орто оскуолатын бүтэрбит
Ефрем Татаринов, Горнай улууһун Бэрдьигэстээх с., СӨ Култуура уонна искусство кэллиэһин бүтэрбит
Сандаара Федотова, Үөһээ Бүлүү улууһун Далыр орто оскуолатын бүтэрбит
Мичил Хомподоев, Дьокуускай куораттааҕы национальнай гимназияны бүтэрбит
Нарыйа Шадрина, Нам улууһун Аппааны с., Н.С.Охлопков аатынан Нам улуустааҕы гимназиятын бүтэрбит
Сергей Эверстов, Дьокуускай куораттааҕы национальнай гимназияны бүтэрбит.
