Москваҕа Саха өрөспүүбүлүкэтин күннэрин чэрчитинэн тэрээһиннэр саҕаланнылар.
edersaas.ru .
Ол курдук, сэтинньи 4 күнүгэр Кириэмиллээҕи Успенскай собуорга Саха сирэ Россия судаарыстыбатыгар холбоспута 385 сылыгар итиэнэ саха дьонугар Халлааннааҕы аанньал буолбут Эҥиэнтэй Сибэтиитэл (Виниаминов) төрөөбүтэ 220 сылыгар анаан, Таҥара сулууспата ыытылынна. Саха сиригэр анаммыт литургия чуолаан бу күн, дойду Норуот сомоҕолоһуутун бырааһынньыгар сөп түбэһиннэрэн ыытыллыбыта мээнэҕэ буолбата, ити тыйыс айылҕалаах хотугу дойду түөрт үйэ тухары сайдан кэлбит историята Россия историятыттан быстыбатын бэлиэтиир. Бу туһунан сулууспаны бэйэтинэн салайан ыыппыт Бүтүн Русь уонна Москва Патриарха Кирилл тоһоҕолоон эттэ.
Литургия былыргы славян, грек уонна саха тылынан ыытылынна. Апосталлар дьайыыларын туһунан сахалыы протоиерей Павел Слепцов, оттон амвон мэлииппэтин иерей Михаил Иннокентьев аахтылар, айхал ырыаларын Нерюнгриттан тиийбит духуобунай ырыа «Соловушка» ансаамбыла толордо. (Санатан эттэххэ, Дьокуускайдааҕы уонна Ленскэйдээҕи епархияттан улахан дэлэгээссийэ тиийэн, Духуобунай академияҕа Эҥиэнтэй Сибэтиитэлгэ анаммыт Аан дойдутааҕы научнай-практическай конференцияны тэрийистэ). Сулууспа кэнниттэн Ил Дархан Егор Борисов баһылыктаах өрөспүүбүлүкэ официальнай дэлэгээссийэтэ «Православнай Русь» быыстапка аһыллыытыгар кыттыыны ылла.
Салгыы Грановитай балаатаҕа Патриарх Кирилл Егор Афанасьевиһы приемнаата, Саха сиригэр хаста да сылдьыбытын, өрөспүүбүлүкэ үлэһит дьонун-сэргэтин сыаналыырын биллэрдэ. Ил Дархан дойду саамай улахан храмыгар сулууспа сахалыы тылынан ыытыллыбытын иһин махтанна, Саха сиригэр Христос итэҕэлэ үөрэхтээһин, култуура сайдыытыгар улахан оруоллааҕын бэлиэтээтэ. Өрөспүүбүлүкэ иллээхтик олорор элбэх омуктарын аатыттан улахан бырааһынньыгынан эҕэрдэлээн туран, духуобунай уонна култууруай үгэстэри сайыннарыы үлэтигэр ситиһиилэри, или уонна эйэни баҕарда. Халлааннааҕы аанньалларбыт Сахабыт сирин араҥаччылыы турдуннар!
Раиса Сибирякова, “Саха сирэ” хаһыат, edersaas.ru .
Хаартыскаларга:
Успенскай собуорга литургияттан.
