Сарсын, ахсынньы 13 күнүгэр, «Москваҕа Уһук Илин күннэрэ» бэстибээлгэ Экспо-кииҥҥэ «Сказочная Якутия» кинигэни билиһиннэриэхтэрэ. Манна бырабыыталыстыба бэрэссэдээтэлэ Владимир Солодов кыттыаҕа.
Манна остуоруйа ааҕыахтара, кинигэ туһунан кэпсиэхтэрэ, викторина ыытыахтара. Кинигэни эрэдээктэр Александр Агафонова оҥорбут, худуоһунньук — Екатерина Соколова, дизайнер — Евгения Веденисова. Кинигэҕэ уон биэс саха остуоруйата киирбит, үгүстэрэ аан бастакытын бэчээккэ тахсыбыттар. Гуманитарнай чинчийии институтун архыыбыгар аудиоҕа харалла сыппыттарын ылан, сурукка түһэрэн, чочуйан оҥорбуттар. Кинигэҕэ баар анал QR-кодунан остуоруйаны истиэххэ сөп.
Санатан эттэххэ, ахсынньы 3 – 15 күннэригэр Москваҕа номнуо үгэскэ кубулуйан эрэр Уһук Илин эрэгийиэннэрин күннэрэ буола тураллар. Федеральнай таһымнаах бырайыак чэрчитинэн, дойду тэбэр сүрэҕэр култуурунай тэрээһиннэр, быыстапкалар, дьыалабыай көрсүһүүлэр ыытыллаллар.
edersaas.ru