Москваҕа олунньу 11 күнүгэр “Пионер” киинэ тыйаатырыгар саха киинэтин бэстибээлэ саҕаланна. Манна түөрт киинэни көрдөрүөхтэрэ. 2020 сылга “Окно в Европу” бэстибээл сүрүн бирииһин ылбыт, режиссер Степан Бурнашев “Хара хаар” триллерэ бэстибээли саҕалаата.
Дойду киин куоратын көрөөччүлэрэ “Пионерга” Эдуард Новиков “Тойон кыыл” драматын, Костас Марсан “Мой убийца” детективын уонна Дмитрий Давыдов “Нет бога кроме меня” драматын көрүөхтэрэ.
Москваҕа бэстибээли арыйыы сиэригэр-туомугар Саха сирин Ил Дархана Айсен Николаев кытынна. Кини Арассыыйаҕа уонна аан дойдуга Саха сирин киинэлэригэр улахан интэриэс үөскээбитин аҕынна. “Бу, бастатан туран, биһиги муҥутуур талааннаах режиссердарбыт үлэлэрин түмүгэ. Кинилэр ураты кинематограбы тэрийдилэр. Москваҕа биһиги киинэбитигэр анаммыт бэстибээл аһылларыттан үөрэбин. Бу хайысханы өссө салгыы сайыннарыахпыт диэн эрэнэбин”, — диэн бэлиэтээтэ өрөспүүбүлүкэ баһылыга.
“Пионер” киинэ тыйаатырын дириэктэрэ Кирилл Хованскай Саха сирин салалтатыгар бэстибээли тэрийиигэ көмөлөрүн иһин махтанна уонна сыл аайы ыытыллыа диэн эрэнэрин эттэ. “Саха кинематограба тэтимнээхтик сайдар уонна хаачыстыбалаах киинэлэринэн үөрдэр. Бу бэстибээл сыл аайы ыытыллыа диэн эрэнэбин”, — диэтэ кини.
Бэстибээл бырагыраамата олунньу 16 күнүгэр “Нет бога кроме меня” киинэнэн түмүктэниэҕэ. Бу күн көрөөччүлэр киинэ ааптара, өссө “Пугало” мистическай триллеры айбыт Дмитрий Давыдовы кытта дьүүллэһиэхтэрэ.
Москваҕа саха киинэтин бэстибээлин “Пионер” киинэ тыйаатыра уонна Арассыыйа Федерациятын Бэрэсидьиэнин иһинэн Саха Өрөспүүбүлүкэтин Бастайааннай бэрэстэбиитэлистибэтэ тэрийдилэр уонна сыллата ыытыллар буолуоҕа.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни Стрюкова
Хаартыска: тустаах саайтан.