Дойду тэбэр сүрэҕэр Москваҕа Нам улууһун ll Хомустааҕын былааҕа күөрэйдэ.
Нэһилиэк аҕа баһылыга Лев Новгородов Москваҕа тиийэн «Мин столицам» диэн сүүрүү марафонугар кытынна. Бу туһунан маннык кэпсээтэ:
— Үлэм сүнньүнэн Москваҕа тиийэ сылдьан сүүрдүм. Уопсайа икки тыһыынча кэриҥэ киһи кытынна. Сүүрүүгэ кыттыым соругунан, дойдум уонна нэһилиэгим былааҕын күөрэччи тутан фиништээһин этэ. Ол баҕа санаабын толордум. Бу сүүрүүгэ миигин доҕорум Гавриил Семенов (Омолдоон) ыҥырбыта. Олунньу ыйга кыһын кини миэхэ «ыҥырыы-челлендж» ыыппыта. Оччолорго ыйааһыным 98 киилэ этэ, сатаан сүүрүөм суоҕа диэн бастаан салла санаабытым, ол эрээри илии тутуспутум. Пандемия кэмэ буолан сайын ыытыллыахтаах сүүрүүбүт иккитэ көһөн, дьэ, бу буолла. Онуоха диэри күүстээхтик дьарыктаммытым, ыйааһыммын да көҕүрэппитим. Москваҕа үлэбинэн тиийиэхтээҕим биллибитигэр, таарыччы бу сүүрүүгэ кыттарга быһаарыммытым. Москваҕа хас өрөбүл ахсын араас хайысхалаах сүүрүүлэр ыытыллаллар эбит.
Бу финишпин нэһилиэгим дьонугар-сэргэтигэр аныыбын. Оттон ыччакка туһаайан, ханна да буолларгыт өрөспүүбүлүкэҕитин, нэһилиэккитин умнумаҥ, ытыктааҥ диэм этэ.
Ульяна Захарова