Москваҕа норуодунай бэйиэт Иван Мигалкины эҕэрдэлээтилэр

Бөлөххө киир:

Алтынньы 22 күнүгэр Москваҕа А.М.Горькай аатынан Литература институтугар Саха сирин норуодунай бэйиэтэ, Саха Өрөспүүбүлүкэтин Суруйааччыларын сойууһун бэрэссэдээтэлэ Иван Мигалкин үөрэммит институтун устудьуоннарын кытары көрүстэ.

edersass.ru

Көрсүһүүнү А.М.Горькай аатынан Литература институтун наукаҕа уонна айар үлэҕэ проректора, филология наукатын хандьыдаата, доцент Сергей Дмитренко арыйда. Бэйиэт айар биэчэрин салгыы “Саха сирин суруйааччылара” ассоциация бэрэссэдээтэлэ Олег Сидоров иилээн-саҕалаан ыытта.
Норуодунай бэйиэт айар үлэтин туһунан дакылааты СӨ Суруйааччыларын сойууһун бэрэссэдээтэлин солбуйааччы, “Полярная звезда” хаһыат кылаабынай эрэдээктэрэ Владислав Доллонов оҥордо.

Үбүлүөйдээх бэйиэти эрэдээктэр, бэйиэт, Арассыыйа Суруйааччыларын сойууһун Москва куораттааҕы тэрилтэтин бырабылыанньатын бэрэссэдээтэлэ Владимир Бояринов, Арассыыйа Суруйааччыларын сойууһун хос бэрэссэдээтэлэ, Суруйааччылар сойуустарын аан дойдутааҕы уопсастыбатын исполкомун бэрэссэдээтэлин солбуйааччы Владимир Федоров, бэйиэт, прозаик, драматург, суруналыыс, “Общеписательская литературная газета” кылаабынай эрэдээктэрэ, СӨ Духуобунаһын академиятын академига Григорий Осипов, философия дуоктара, Нуучча тылын аан дойдутааҕы академиятын президенэ, куттал суох буолуутун уонна конфликтология Европатааҕы академиятын академига Сергей Каратов уо.д.а. эҕэрдэлээтилэр.
Иван Мигалкин бэйэтин этиитигэр айар үлэ уонна аныгы литература туһунан санаатын үллэһиннэ, Литература институтугар үөрэммит сылларын ахтан-санаан ааста, кинигэлэрин билиһиннэрдэ.
Уус-уран тылбаас кафедратын преподаватела, Литература институтун доцена Аита Шапошникова саха устудьуоннарын бөлөҕүн устудьуоннарын уонна бэйэтин аатыттан эҕэрдэтин тириэртэ.
Истиҥ көрсүһүү архиепископ сүбэһитэ, М.К.Аммосов аатынан ХИФУ сурук-бичик мусуойун дириэктэрэ, М.К.Аммосов аатынан СӨ Судаарыстыбаннай бириэмийэтин лауреата, СӨ Духуобунаһын академиятын академига Афанасий Мигалкин эҕэрдэтинэн түмүктэннэ.
Көрсүһүүгэ Иван Васильевиһы М.Ю.Лермонтов мэтээллээх дипломунан, В.В.Маяковскай уордьаннаах “Светить всегда” литературнай-уопсастыбаннай бириэмийэ дипломунан, С.А.Есенин аатынан аан дойдутааҕы литературнай бириэмийэ лауреатын дипломунан наҕараадалаатылар.
Көрсүһүү кыттыылаахтара Литература институтун уус-уран тылбааска кафедратын саха бөлөҕүн устудьуоннарыгар сэминээри ыыттылар.

“Саха сирэ”, edersaas.ru сайтка анаан Владислав ДОЛЛОНОВ

+1
0
+1
0
+1
0
+1
0
+1
0
+1
0
+1
0