Соторутааҕыта Москваҕа П.И.Чайковскай аатынан консерваторияҕа композитор Марк Жирков аатынан үрдүк үөрэх кыһаларын икки ардыларынааҕы куонкурус түмүктүүр түһүмэҕэ ыытылынна.
edersaas.ru
Манна П.И.Чайковскай аатынан Москватааҕы консерватория уонна В.А.Босиков аатынан СӨ Муусука үрдүкү оскуолатын 14 вокалист-устудьуона кытынна.
Дьүүллүүр сүбэҕэ П.И.Чайковскай аатынан МГК профессора, Арассыыйа норуодунай артыыһа Петр Скусниченко, ССРС уонна РСФСР норуодунай артыыһа, П.А.Ойуунускай аатынан Саха АССР, М.И.Глинка аатынан РСФСР судаарыстыбаннай бириэмийэлэрин лауреата Анегина Ильина-Дмитриева, РСФСР норуодунай артыыһа, Мусукаалынай диэйэтэллэр Норуоттар икки ардыларынааҕы сойуустарын чилиэнэ, искусствоведение доктора, профессор Юрий Григорьев, уо.д.а. муусука, ырыа эйгэтигэр ааттаах-суоллаах дьоннор үлэлээтилэр.
Бу, консерватория биир бастыҥ — Рахманинов саалатыгар ыытыллыбыт куонкурус түмүктэринэн, биһиги өрөспүүбүлүкэбит Муусука үрдүкү оскуолатын (ВШМ) устудьуоннара, Москва консерваториятын (МГК) устудьуоннарын сэргэ, дьоһуннаахтык, ситиһиилээхтик кыттан, бириистээх миэстэлэри ыллылар.
Гран-При Тимофей Журавель (МГК) буолла. Оттон Муусука үрдүкү оскуолатын 4-с кууруһун устудьуона Александр Степанов (СӨ үтүөлээх артыыһа В.И.Колодезникова кылааһа) I истиэпэннээх лауреат аатын ылла уонна “М.Н.Жирков айымньыларын бастыҥ толоруу” анал бирииһи тутта.
Маны таһынан, Александр Степанов Санкт-Петербурга сольнай кэнсиэрин оҥорор кыахтанна.
Муусука үрдүкү оскуолатын устудьуоннара: Юлия Караченцева, 5-с куурус ( Е.В.Яковлева кылааһа) – дипломант уонна “Көрөөччүлэр биһирэбиллэрэ” анал бириис; Русалида Донская, 2-с куурус (А.М.Кычкина кылааһа) –дипломант уонна Роскосмос анал бирииһэ; Сардаана Шараборина, 5-с куурус (А.М.Кычкина кылааһа) –дипломант; Алексей Иванов, 1-кы куурус (В.И.Колодезникова кылааһа) — дипломант уонна анал бириис хаһаайына буоллулар.
Оттон СӨ Муусука үрдүкү оскуолатын концертмейстера Людмила Ускова Москваҕа Саха Өрөспүүбүлүкэтин Бастайааннай бэрэстэбиитэлистибэтин “Идэтигэр бэриниитин, үрдүк профессионализмын иһин” анал бирииһинэн наҕараадаланна.
Татьяна Маркова, edersaas.ru
Ирина Дьячкова хаартыскаҕа түһэриитигэр: Куонкурус кыттыылаахтара, педагогтар уонна тэрийээччилэр П.И.Чайковскай аатынан Москватааҕы консерватория Рахманинов саалатыгар.