Москваҕа алтынньы 30 күнүттэн сэтинньи 7 күнүгэр диэри локдаун (харантыын) киириэн сөп. Бу күннэри Владимир Путин дойду үрдүнэн өрөбүл күннэринэн биллэрбитэ.
Локдаун буолара-буолбата коронавируһунан ыалдьыы төһө элбэҕиттэн тутулуктаах. Бу нэдиэлэҕэ ааспыт нэдиэлэтээҕэр элбэх ыалдьыы баар буоллаҕына, кытаанах эрэсиими киллэрэллэр. Оччотугар туох баар атыы-эргиэн дьиэлэрэ, эрэстэрээннэр, кафелар, маҕаһыыннар, култуура тэрилтэлэрэ, бэл, поликлиникалар үлэлээбэттэр. Маассабай, спортивнай, аралдьытар тэрээһиннэр буолбаттар.
Бородуукта маҕаһыыннара, аптекалар үлэлииллэр, онлайн-эргиэн, дьиэҕэ тиэрдэн биэрии өҥөлөрө көҥүллэнэллэр.
Билиҥҥитэ, Москваҕа уопсастыбаннай сирдэргэ QR-куодунан киллэрии былааннаммат. Мэр Сергей Собянин ыйааҕынан, сааһырбыт дьону 4 ыйга бэйэни хааччахтанан олоруу эрэсиимигэр ыыттылар. Үлэни биэрээччилэр үлэһиттэрин 30%-на дьиэттэн үлэҕэ ыытыахтаахтар.
Ангелина Васильева, “Саха сирэ” хаһыат, edersaas.ru