Бэс ыйын 7 күнүгэр Саха Өрөспүүбүлүкэтэ Москваҕа «Extra Cinema» киинэ быракаатын сайдыытыгар дэҥҥэ көстөр бырайыагын билиһиннэриэҕэ. Саҥа технологическай проектор “Саха сирэ” Технопаарка базатыгар оҥоһулунна.
edersaas.ru
«Биһиги туһалаах баайы хостооһунтан ылар быйаҥмытын саҥа экэниэмикэ сайдарыгар, бастатан туран, киһи хапытаалын сайыннарарга, Саха сиригэр баар улахан креативнай талааны олоххо киллэрэргэ ыытыахтаахпыт”, — диэн СӨ Ил Дархана Айсен Николаев этэн турар.
Киинэ проектора уонна киинэ ситимин кэҥэтэр платформа, бастатан туран, аҕыйах нэһилиэнньэлээх эрэгийиэннэргэ ананаллар. Билигин боруобалааһыны 10 нэһилиэнньэлээх пууҥҥа ыыталлар. Тэриллэри атыылаһарга муниципальнай тэриллиилэргэ өрөспүүбүлүкэ бүддьүөтүттэн үп бэриллибитэ. Саха Өрөспүүбүлүкэтигэр киинэ ситимин салайааччы Петр Чиряев этэринэн, Арассыыйа быракаатыгар саҥа кэм-кэрдии саҕаланар – сотору кэминэн DCP оннугар 4К формат баар буолуоҕа. «Киинэ репертуарын көрөөччүлэр талаллар. Тыа сирин култуураларын дьиэтигэр, оскуолаларга уонна модульнай бибилэтиэкэлэргэ табыгастаах буолуоҕа, кэнники тахсыбыт уус-уран киинэлэр, документальнай уонна үөрэххэ туһаныллар киинэлэр көрдөрүллүөхтэрэ, ааптар бырааба тутуһуллар..”, — диэн саҥа технология уратытын туһунан Петр Чиряев быһаарар.
Бырайыагы бэс ыйын 7 күнүгэр 19.10 чааска Горькай аатынан пааркаҕа “Киинэ уонна ТВ, анимация” павильоҥҥа билиһиннэриэхтэрэ. Мана Саха сирин Ил Дархана Айсен Николаев, киинэ пуондатын, эрэгийиэннээҕи киинэ пуондатын, быракаат эрэгийиэннээҕи ситимнэрин бэрэстэбиитэллэрэ, киинэни оҥорооччулар уонна Арассыыйа креативнай нэдиэлэтин кыттыылаахтара кыттыахтара. Айсен Николаев ону сэргэ “Саҥа кэм – креативнай сиэктэр саҥа быраабылалара” пленарнай мунньахха, “Национальнай тыйаатыр оскуолата — креативнай контекст – Кырыымтан Камчаткаҕа тиийэ” диэн кэпсэтиигэ кыттыаҕа.
“Ыччат айар көҕүлээһинин киинэ” (Роскультцентр) уонна Саха Өрөспүүбүлүкэтин икки ардыларыгар бииргэ үлэлиир туһунан Сөбүлэһиигэ илии баттаныаҕа.
Бэс ыйын 7-10 күннэригэр Москваҕа ыытыллар “Арассыыйа креативнай нэдиэлэтэ” бырагырааматыгар дойду 40-тан тахса эрэгийиэниттэн дэлэгээссийэлэр аан бастаан кыттыахтара. Субъектар баһылыктара, былаас уорганнарын уонна салаа бэрэстэбиитэллэрэ креаитивнай индустрия сайдыытын оруолун уонна сайдар кэскилин дьүүллэһиэхтэрэ.
Надежда ЕГОРОВА, «Саха сирэ», edersaas.ru