Бэҕэһээ эбиэт кэннэ Москваҕа сөкүүндэҕэ 20 — 22 миэтэрэ түргэннээх күүстээх тыаллаах этиҥнээх ардах түһэн, улахан хоромньуну таһаарда.
Елена ПОТОЦКАЯ, «Саха сирэ» хаһыат, edersaas.ru
ССТА суруналыыһа Антон Новодережкин иһитиннэрбитинэн, үрдүлэригэр мас сууллан, 11 киһи өллө. Билиҥҥи туругунан, 170-ча киһи эчэйбитэ биллэр. 146 киһи, ол иһигэр 22 оҕо, балыыһаҕа киирбит. Бу туһунан суруналыыстарга Москватааҕы доруобуйа харыстабылын департаменын салайааччыта Алексей Хрипун иһитиннэрдэ. Эмсэҕэлээбит дьон үксүлэрэ төбөлөрүн уонна тоноҕосторун эчэппиттэр. РФ Гидрометкиинин дириэктэрэ Роман Вильфанд иһитиннэрбитинэн, хотуттан кэлбит тымныы тыал атмосфера сылаас салгынын сүүрээнин кытта холбоһуутун түмүгэр маннык күүстээх буурҕа түспүт.
Дойду тэбэр сүрэҕэр бэҕэһээҥҥи күүстээх буурҕа түһүүтүн 1998 сыллааҕы күүстээх тыалы кытта тэҥнииллэр. Ол эрээри Москва метеорологтара элбэх дьон өлүүлээх айылҕа быһылаана сүүс сылга биирдэ буолбут түбэлтэ диэн бэлиэтииллэр. Өлбүт дьоҥҥо барыларыгар кэриэтэ үрдүлэригэр баараҕай мас сууллубут. Социальнай ситимнэргэ тахсыбыт видеоларга көрдөххө, күүстээх буурҕа мастары аҕыйах түгэн иһигэр сиртэн силистиин хостообут. Инньэ гынан, дьон саһар да, куотар да кыахтара суох буолан биэрбит.
Соҕуруу уокурук Кировскай уулуссатыгар оптуобус тохтобулун асфальтан түөрэ хостоон түһэрбит. Ол кэмҥэ тохтобул аттынан ааһан эрэр эр киһиэхэ үрдүгэр тимир конструкция түһэн, тута өлбүт. Красногорскай оройуон Путилково дэриэбинэтигэр тимир олбуор үрдүгэр сууллан, 57 саастаах киһи эмиэ тута өлөөхтөөбүт. Раменскай оройуон Кратово бөһүөлэгин 11 саастаах олохтооҕо кыысчаан үрдүгэр эмиэ тиит сууллан түспүт. Склифософскай аатынан институкка сытар 14 ыарыһаҕы Москва мээрэ Сергей Собянин көрүстэ. Кини суруналыыстарга күүстээх тыалтан эмсэҕэлээн өлбүт дьон дьиэ кэргэттэригэр 1 мөл. солк. көмөнү оҥоруохпут диэн эттэ.
Алдьатыылар
Буурҕа күн ортото Москва куорат киинигэр эмискэ түспүт. Бастаан тыалыран барбытыгар, дьон көннөрү тыал түстэ диэн, соччо аахайбатахтар. Онтон чаҕылҕан чыпчылыйаатын кытта, реклама щиттэрин суулларар тыал түспүт, онтон улам күүһүрэн, мастары, тимир гараастары суулларан барбыт. Куорат уу нуурал олоҕо эмискэ харгыстаммыт. Внуково аэропорка ыксыыр дьон рейстэрин куоттарымаары, ааһан иһэр массыыналары тохтото сатаабыттар да, бары буурҕаттан куотар аатыгар сылдьар суоппардар, тохтуур диэн суох үһү. Филевскэй метрополитен линиятыгар сырыы эмиэ тохтоон, куорат таһыгар айан эмиэ бытаарбыт.
— Мин метроттан тахсаат, чугас турар супермаркекка сүүрэн киирбитим. Онно киһи бөҕө мустан турара. Ким ханна баран иһэрин умнан, уолуйбуттара сүрдээх этэ, — диэн “Лента.ру” интэриниэт-таһаарыыга москвичка Ирина Столяревич кэпсиир.
Оннооҕор 44 миэтэрэлээх 55 тонналаах 1999 сыллаахха Александр Голод оҥорбут пирамидата сууллубутун көрөн үгүс киһи сөхтө.
— Бу алдьаммыт оҥоһук оннугар мин 100 миэтэрэлээх пирамиданы туруоруом. Бу сырыыга пластиктан буолбакка, тимир бетонтан оҥоруом. Бырайыагым номнуо бэлэм. Көмөлөһөөччүлэрбин буллум да, үлэ саҕаланыа, — диэн суруналыыстарга пирамида ааптара Александр Голод кэпсээбит .
Внуково аэропордун аэровокзалын уонна Шаховскай оройуон роддомун кырыыһалара алдьаммыт. Москва биэс мэндиэмэннээх дьиэлэрин кырыыһалара “көппүттэр”. Кремль Сенатскай дыбарыаһын, ВГИК уонна Петровка 38-гар баар ИДьМ кылаабынай куорпустарын кырыыһалара эмиэ алдьаммыт. Москва аннынааҕы Королев куоракка күүстээх тыал Богородица Ороһуоспатын храмын куупалыттан кириэһин суулларбыт. Бэнидиэнньик күн 17:30 чаастааҕы чахчынан, Москва уобалаһын 18 300 киһи олорор 102 нэһилиэнньэлээх пууна уота суох олорбут.
Хоромньуну толуйуу
ТАСС иһитиннэрэринэн, сүүһүнэн Москва олохтооҕо автостраховка үлэһиттэригэр сайабылыанньа түһэрбит. Суруктарыгар тиит мас сууллубутуттан сылтаан, массыына түннүгүн өстүөкүлэтэ алдьаммытыттан саҕалаан, киһи туһаммат гына “кумаламмытыгар” тиийэ ыйбыттар. «АльфаСтрахование» тэрилтэҕэ даачалаах уонна куорат таһыгар страховкаламмыт дьиэлээх дьон сайабылыанньа суруйбуттар. «РЕСО-Гарантии” тэрилтэҕэ эмиэ бэрт элбэх көрдөһүү сурук киирбит.
— Күн-дьыл туруга урукку дьылларга холоотоххо, 8 – 9 кыраадыһынан намыһах. Бу нэдиэлэ бүтэһигэр диэри Москваҕа күн-дьыл күһүҥҥүлүү туруоҕа: күнүс +5…+10, түүн +3…+8 кыраадыс. Ардах тохтообокко түһүөҕэ. Бу курдук, күн-дьыл сайын саҕаланыытыгар буолбакка, муус устарга бэлиэтэнээччи, — диэн синоптиктар кэпсииллэр.
Елена ПОТОЦКАЯ, «Саха сирэ» хаһыат, https://edersaas.ru
Хаартысканы интернет-таһаарыылартан туһанным.