Москваҕа балаҕан ыйын 7 күнүттэн 10 күнүгэр диэри Фашизм сиэртибэлэрин аан дойдутааҕы күнүгэр уонна Улуу кыайыы 75 сылыгар анаммыт Фашизмы утары аан дойдутааҕы форум ыытыллыаҕа.
edersaas.ru
Бу түһүлгэ сүрүн сыала – аан дойдуну фашизм суоһааһыныттан харыстааһын. Маннык девизтээх ыытыллар: “Биһиги – фашизм оҥорбут хара аньыытын тиһэх туоһуларабыт. Аан дойду уонна оҕолорбут тустарыгар фашизмы бохсуоҕуҥ!”
Улуу Кыайыы кэнниттэн 75 сыл буолан баран, киһи-аймах эмиэ фашизм дьайыыларын кытта алтыһарга күһэллэр. Кэккэ дойдуларга тахсар түгэннэр фашистскай концлааҕырдар урукку сиэртибэлэрин абарыытын-сатарыытын таһаараллар. Бу дьон оҕо саастара эмсэҕэлээбитэ: кинилэргэ уопуттары оҥороллоро, аччыктатан-хоргутан муҥнууллара, тоҥорон сордууллара, хааннарын ылаллара. Кыра саастаах хаайыылаахтар 90 бырыһыаннара өлбүтэ, фашистар хаайыыларын иһигэр хас онус эрэ киһи тыыннаах хаалбыта.
Тэрийээччилэринэн фашизм кыра саастаах урукку узниктарын норуоттар икки ардыларынааҕы сойууһа, фашизм узниктарын саастарын ситэ илик оҕолорун Арассыыйатааҕы сойууһа, “Күүстээх Арассыыйа” Бүтүн Арассыыйатааҕы хамсааһын уонна “Арассыыйа офицердара” Бүтүн Арассыыйатааҕы тэрилтэ буолаллар.
Форум кэмигэр араас дойдуларга тахсар фашизм аныгы көстүүлэрин туһунан дакылааты истиэхтэрэ. Уопсастыба өттүттэн фашизмы утары хайдах охсуһары быһаарсыахтара. Аан дойду иккис сэриитин устуоруйатын токурутуу боппуруоһун көрүөхтэрэ. Ыччаты патриотическай иитии туһунан кэпсэтиэхтэрэ.
Фашизмы утары форумҥа национальнай сойуустар уонна урукку узниктар тэрилтэлэрин салайааччылара, ону тэҥэ Армения, Беларусь, Казахстан, Латвия, Литва, Молдова, Узбекистан, Украина, Эстония, Болгария, Германия, Австрия, Словения, а также Израиль, Польша и АХШ дойдуларыттан уопсастыбаннай түмсүүлэр кыттыахтара.
Аан дойдутааҕы түһүлгэҕэ тэрийэр кэмитиэт салалтата, бэтэрээннэр тэрилтэлэрэ, Аҕа дойду Улуу сэриитин, тыыл бэтэрээннэрэ, төгүрүтүүгэ түбэспит Ленинград олохтоохторо, Сэбиэскэй Сойуус уонна Арассыыйа Федерациятын Дьоруойдара, устуоруктар кэлиэхтэрэ.
Маны сэргэ Госдуума, Федерация Сэбиэтин сис кэмитиэттэрин салайааччылара, РФ Уопсастыбаннай палаататын хамыыһыйалара, РФ Үлэҕэ уонна үөрэххэ министиэристибэлэрэ уо.д.а. кытталлара күүтүллэр.
Фашизмы утары форуму Арассыыйаҕа бэлиэтэнэр Өйдөбүнньүк уонна албан аат сылын сүрүн былааныгар киллэрбиттэрэ. Улахан түмсүү аан дойду иккис сэриитэ түмүктэммитэ 75 сылыгар ыытылларынан суолтата улахан.
Быйылгыттан ыла бу тэрээһин балаҕан ыйын иккис баскыһыанньатыгар сыллата ыытыллыаҕа.
Бэлэмнээтэ Женни Стрюкова, edersaas.ru
Хаартыска: тустаах саайтан