Москваҕа эдэр музыканнар күрэстэрэ ыытыллыа

Ааптар: 
Бөлөххө киир:

Саха сирин бастакы идэтийбит композитора Марк Николаевич Жирков аатынан норуоттар икки ардыларынааҕы куонкурус пианиноҕа оонньуур эдэр музыканнарга ыытыллыа.

Күрэс муус устар 10-14 күннэригэр Москва консерваториятыгар буолара былааннанар диэн РФ Бэрэсидьиэнигэр СӨ Бастайааннай бэрэстэбиитэлистибэтин пресс-сулууспата иһитиннэрэр.
Күөн күрэһи СӨ Култуура уонна духуобунай сайдыы министиэристибэтэ, В.А.Босиков аатынан музыка үрдүкү оскуолата, П.И.Чайковскай аатынан Москватааҕы судаарыстыбаннай консерватория, Саха сирин композитордарын сойууһа, Бүлүү улууһун дьаһалтата уонна М.Н.Жирков аатынан Бүлүүтээҕи оҕо ускуустубатын оскуолата тэрийэллэр.
Куонкуруһу тэрийии боппуруостарын Москваҕа РФ Бэрэсидьиэнин иһинэн СӨ Бастайааннай бэрэстэбиитэлистибэтигэр дьүүллэстилэр. Күөн күрэһи икки сылга биирдэ тэрийэри, тиһиктээхтик салҕаан ыытары кэпсэттилэр. Бырагыраамаҕа саха композитордарын айымньыларын киллэрии биир сүрүн уратынан буолара быһаарыллыбыт. Куонкуруска кыттааччылар саастарынан үс бөлөҕүнэн күрэстэһиэхтэрэ (7-14 саастаахтар, 15-18 саастаахтар уонна 19-тан үөһээ саастаахтар) диэн этиллэр. Пианистар толорууларын Москва консерваториятын, СӨ Музыка үрдүкү оскуолатын уонна атын дойдуттан ыҥырыылаах музыканнар сыаналыахтара диэн бэлиэтээбиттэр.
«Куонкурустан тирэхтэнэн үүнэр-сайдар кыаҕы ылар эдэр музыканнар оонньуулларын истэр олус үчүгэй. Күөн күрэс тиһиктээхтик ыытыллара наадалаах», — диэн РФ Бэрэсидьиэнигэр СӨ Бастайааннай бэрэстэбиитэлэ Андрей Федотов эппит.
«Күрэс бырагырааматыгар саха композитордарын музыкатыгар акцент оҥоһуллара — дойдубут музыкатын кэпсэтиинэн эрэ буолбакка, ис дьиҥэр киирэн билии, истии олус үчүгэй.  Тоҕо диэтэххэ, үнүстүрүмүөҥҥэ оонньуурга дууһаҕынан музыкаҕа куустараргын сэргэ, норуот култууратын эмиэ билэҕин», — диэн Москва консерваториятыгар фортепиано кафедратын доцена Денис Чефанов бэлиэтээбит.
СӨ Музыка үрдүкү оскуолатыгар фортепиано кафедратын ыстаарсай преподавателэ Алексей Слепцов бу күрэс былырыын ыытыллыахтааҕын пандемия мэһэйдээбитин бэлиэтээбит. «Музыка үрдүкү оскуолата — оҕолору олус үчүгэйдик үөрэтэр күүстээх үлэлээх оскуола, онон оҕолорбут бириистээх миэстэлэргэ тиксиэхтэрэ диэн эрэнэ саныыбын», — диэбит кини.
Марк Николаевич Жирков Бүлүүгэ төрөөбүт, Москва консерваториятын бүтэрбит, композитор, музыковед, САССР уонна РСФСР ускуустубатын үтүөлээх диэйэтэлэ, саха бастакы операларын, балеттарын, симфоническай уонна инструментальнай айымньылар ааптардара, саха норуотун ырыаларын чочуйан таһаарбыт.
+1
0
+1
0
+1
0
+1
0
+1
0
+1
0
+1
0