Бэс ыйын 1 күнүгэр Москваҕа Кинематографистар киин дьиэлэригэр Валентин Макаров режиссердаах «Дьулуур: мас-рестлинг» киинэ сүрэхтэннэ. Арассыыйа кинематографистарын сойууһа, СӨ Бастайааннай бэрэстэбиитэлистибэтин өйөбүлүнэн Кинематографистар киин дьиэлэрэ тэрийэн ыыттылар.
Кинематографистар дьиэлэрин креативнай продюсера Дарья Муромова: «Киинэ дьиэтэ сахалыы киинэлэр федеральнай таһымҥа сүрэхтэнэр былаһааккалара буолбутунан киэн туттабыт. Саха сирин киинэтэ бүтэһик сылларга киноиндустрия феномена буолла диир толору бырааптаахпыт. Манна этническай сюжекка эрэ олоҕурбакка, бүтүн устар бөлөх биир киһи курдук тэрээһиннээхтик, санааҕа бэриниилээхтик үлэлиирэ сөхтөрөр. Ол иһин тупсаҕайдык уһуллубут маассабай сыаналары көрөбүт. Аныгы киинэҕэ бу эриэккэс көстүүнэн буолар. Мин билэрбинэн, «Дьулуур» маассабай сыанатыгар 1000-ттан тахса киһи уһуллубут», — диэн санаатын эттэ.
Саҥа киинэни продюсердар Филипп Абрютин, Оксана Лахно уонна артыыс Ратмир Гарифуллин билиһиннэрдилэр.
«Устар бөлөхпүт хас биирдии чилиэнигэр уонна РФ Култуураҕа министиэристибэтигэр улаханнык махтанабыт. «Дьулуур» киинэ бу биэдэмистибэттэн үбүлэммит сахалыы бастакы киинэнэн буолар. Биһиги бырайыакпытыгар эрэммиттэриттэн олус үөрэбит. Онон биһиги хаачыстыбалаах, интэриэһинэй киинэни оҥордубут. Икки сыллаах үлэбитин көрөөччүлэр сэргиэхтэрэ диэн эрэнэбин», — диэн продюсер Филипп Абрютин эттэ.
Киинэҕэ Дерек Мартинс оруолун итэҕэтиилээхтик оонньообут Ратмир Гарифуллин:
— Бу оруолум Арассыыйа таһымнаах киинэҕэ мин бастакы холонуум буолла. Бу иннинэ Татарстаҥҥа толору, кылгас миэтирдээх, киинэлэргэ, сериалларга уһуллубутум. Мин санаабынан уонна көрөөччү сыанабылынан ылан көрдөххө, бу дебютум табылынна. Режиссер Валентин Макаров уонна продюсер Филипп Абрютин американец оруолун Дьокуускайга ыалдьыт уонна Америка спортсменын хайдах сөп быһыылаахтык көрдөрөр туһунан орто сүнньүн буллулар быһыылаах. Мин дьиэ кэргэним бары успуорка сыһыаннаах дьон, онон мин успуорт эйгэтигэр улааппытым, билэр эйгэм. Дьокуускайга тиийэн мас-рестлиҥҥэ аан дойду чөмпүйүөнүн кытта эрчиллибитим, кини миэхэ араас албастары көрдөрбүтэ. Улахан ыараханы көрсүбэтэҕим, киинэҕэ мантаас күүрээни эптэ диэххэ сөп.
МИСиС аспирана Георгий Данилов киинэ туһунан санаатын үллэстэр:
— Киинэни олус сөбүлээтим. Оонньуур артыыстары барыларын билэбин. Ордук муусуканан киэргэтиини, тыаһы-ууһу эбэн биэриини бэлиэтиэм этэ. Сахалыы киинэҕэ саҥаны, тыаһы-ууһу сөпкө таҥан туруорар буолбуттар эбит. Тылбаас табыллыбыт диэн эбэн этэбин. Эдэр артыыстар оонньууларын толоруутун сөбүлээтим. Киинэни көрө олорон, көрөөччүлэр ытыстарын таһыммыттара даҕаны үгүһү этэр дии саныыбын. Мас-рестлиҥҥэ улаханнык быһаарсыбаппын, ол да буоллар күрэхтэһии тыынын олус табан оҥорбуттар.
Тэрээһиҥҥэ РФ Бэрэсидьиэнигэр СӨ Бастайааннай бэрэстэбиитэлин бастакы солбуйааччы Александр Сафронов уонна Боевой искусство Арассыыйатааҕы Сойууһун толорор дириэктэрин сүбэһитэ Анна Субботина бочуоттаах ыалдьыттарынан буоллулар.
Киинэ сүрэхтэниитин чэрчитинэн Арассыыйаҕа уонна аан дойдуга мас-рестлинг сайдыытыгар кылаатын уонна үтүө суобастаах үлэлэрин иһин «Бастайааннай бэрэстэбиитэлистибэ 100 сыла» диэн үбүлүөйдээх бэлиэлэри туттардылар. Бастакы солбуйааччы Александр Сафронов чэпчэки атлетика Арассыыйатааҕы федерациятын толорор дириэктэрин Борис Гришини, Боевой искусство Арассыыйатааҕы Сойууһун толорор дириэктэрин сүбэһитин Анна Субботинаны уонна мас-рестлинг норуоттар икки ардыларынааҕы федерациятын вице-бэрэсидьиэнин Лена Томскаяны наҕараадалаата.
1934 сылтан Киинэ дьиэтэ Арассыыйа кинематографистарын түмэр идэлээх кулуубунан буолар. Манна араас таһымнаах киинэ бэстибээллэрэ, киинэ сүрэхтэниилэрэ, айар киэһэлэр, ырытыылар, маастар-кылаастар, кэмпириэнсийэлэр ыытыллаллар.
СӨ Бастайааннай бэрэстэбиитэлистибэтин пресс-сулууспатыгар матырыйаал иһин махтанабыт!
domkino.pro саайтан.