Муус устар 9 күнүгэр Москваҕа киин куорат сууттара тоҕус киһини “изоляция” эрэсиимин кэспиттэрин иһин, 15-тии тыһыынча солкуобайга ыстарааптыыр туһунан уураахтара таҕыста.
Холобур, Коптевскай суут Москва уобалаһыгар олорор киһи туох да улахан биричиинэтэ суох киин куоракка сылдьан тутуллубутун биллэрдэ, буруйдааҕынан аахта. Бу маны Административнай быраабы кэһии кодексын (КоАП) саҥа киирбит 2.6.3. ыстатыйатын кэһии курдук сыаналаатылар.
Преображенскай суут Москва мэрин ыйааҕар ыйыллыбыт биричиинэтэ суох, дьиэтиттэн балачча тэйэн, спортивнай былаһааккаҕа сылдьан тутуллубут дьахтары эмиэ буруйдааҕынан аахта. Маны тэҥэ, дьахтар былаһаакканы бүөлүү ыйаммыт сэрэтэр лиэнтэлэри быһыта тыытан бырахпыт. Иккиэннэригэр 15-тии тыһыынча ыстараабы “саайдылар”.
Щербинскэй суут 7 дьыаланы көрөн, буруйдаахтары ыстарааптаата.
Москва куорат мэрэ Сергей Собянин кулун тутар 29 күнүгэр муҥутуур бэлэмнээх эрэсиими өссө кытаатыннаран биэрбитэ. Онон бу кэмтэн ыйаахха этиллибитинэн, биричиинэтэ суох дьиэттэн тахсар бобуллубута. Ыйаахха олоҕуран дьиэ аттыгар ас, эмп атыылаһа, бөх тоҕо, ыты күүлэйдэтэ эрэ тахсар көҥүллэммитэ. Мэдиссиинэ көмөтүгэр наадыйдахха эмиэ тахсар көҥүллэнэр. Оттон үлэлиир дьон ыспыраапкалаах сылдьыахтаахтар.
Маннык кытаанах миэрэ киирбитэ сөптөөх. Москваҕа коронавируһунан ыалдьыбыт киһи ахсаана элбээн иһэр. Балачча киһи өллө. Күн аайы тыһыынчаттан тахсалыы киһи ыалдьан, балыыһаҕа киирэ турар. Быраастар аанньа аһаабакка, туалеттаабакка да эрэ, 12-лии чаас тура тэбинэ сылдьан, дьуһуурустубалыыллар. Сотору кэминэн, өссө элбэх киһи киирдэҕинэ, балыыһалар куойкалара да, быраастар кыахтара да тиийбэт буолуон сөп. Мөлүйүөнүнэн киһи олорор улахан куоратыгар сыстыһыы да элбэх. Сорох дьон ону өйдөөбөттөр, тус көҥүллэрин күөмчүлэтэр курдук саныыллар.
Муус устар 8 күнүгэр Ил Дархан эмиэ маннык ыйаахха илии баттаабыта. Полиция уулуссалары кэрийэн, күүлэйдии сылдьар дьону бэрэбиэркэлээн барбыта. Ол гынан баран, барыларын тутан, хаайан, ыстарааптаан эрэллэр диир сыыһа. Бастаан сэрэтэр үлэни ыыталлар, кэпсэтэллэр, өйдөтөллөр. Ону тэҥэ, полиция үлэһиттэрэ харчыны хомуйбаттар, арай, дьыаланы суукка биэрэллэр. Билиҥҥитэ, биһиги итинниккэ тиийэ иликпит, суукка бэриллибит дьыала суох.
Күн бэҕэһээ киин уулуссаларынан хаамса сылдьар дьон элбэх этэ: чап-чараас таҥастаах, үтүлүгэ-бэргэһэтэ суох сүүрэкэлэһэр уончалаах уолаттар, сиэттиспит пааралар, бэл, саастаах дьон…
Коронавирус тарҕаныытын бастакы 2-3 нэдиэлэтэ ордук быһаарыылаах буолар. Эпидемия тарҕаныытын кэлиини-барыыны тохтотон, дьиэҕэ олорон эрэ, бохсуохха сөп.
Ангелина Васильева, “Саха сирэ” хаһыат, edersaas.ru
Хаартыска: utro.ru