Москва бырабыыталыстыбатын кэнсиэртиир саалатыгар Саха АССР тэриллибитэ 100 сылыгар, Саха сирэ Арассыыйаҕа холбоспута 390 сылыгар, РФ бэрэсидьиэнин иһинэн бастайааннай бэрэстэбиитэлистибэ 100 сылыгар, М.К. Аммосов төрөөбүтэ 125 сылыгар аналлаах дьоро киэһэ буолан ааста.
Саалаҕа киириэх иннинэ фойеҕа Саха сирин экэнэмиичэскэй, култуурунай ситиһиилэрин быыстапката, биллэр худуоһунньуктар, скульптордар үлэлэрэ көрдөрүүгэ турдулар.
Тэрээһин Арассыыйа уонна Саха сирин гимнэрин толоруунан саҕаланна. Өрөгөй ырыаны Бүлүү улууһун холбоһуктаах хора (сал. О.Корякина) толордо. А.Д. Макарова аатынан култуура, ускуустуба колледжын устудьуоннарын “Өркөн” үҥкүү ансаамбыла сыананы киэргэттэ.
Ил Дархан Айсен Николаев мустубут дьону видеонан эҕэрдэлээтэ. Ону тэҥэ, СӨ бастайааннай бэрэстэбиитэлэ, СӨ бырабыыталыстыбатын бэрэссэдээтэлин бастакы солбуйааччы Андрей Федотов эҕэрдэ тылын эттэ уонна судаарыстыбаннай наҕараадалары туттартаата.
Ил Түмэн спикерэ Алексей Еремеев 100 сыл устата Саха сирин эрэгийиэннээҕи баалабай бородууктата 618 төгүл улааппытын, билигин Уһук Илин баалабай бородууктатын 20%-нын өрөспүүбүлүкэ ыларын бэлиэтээтэ. Хас биирдиибит өрөспүүбүлүкэ сайдыытыгар кылаатын киллэрэригэр, үлэлээн-хамсаан, олох таһымын тупсарарбытыгар баҕарда.
Саха АССР 100 сылыгар үбүлүөйүнэй бэлиэ оҥоһуллубута. Саха сирин уонна Арассыыйа ситимнэрин бөҕөргөтүүгэ, өрөспүүбүлүкэ сайдыытыгар кылааттарын киллэрбит дьоҥҥо үөрүүлээх быһыыга-майгыга туттардылар.
Улахан экраҥҥа бастайааннай бэрэстэбиитэлистибэ үлэтин сырдатар «100 лет во благо Якутии» диэн киинэни быһа тардан көрдөрдүлэр. 2022 сыл кулун тутар 16 күнүгэр тэриллибит бэрэстэбиитэлистибэни Максим Аммосов салайбыта. Бэрэстэбиитэлистибэ тэриллибит күнүттэн Москваны кытары сыһыаҥҥа, бүддьүөттэн үп-харчы киириитигэр, төрүт олохтоох норуоттар интэриэстэрин көмүскүүр сокуоннар ылыллыыларыгар, экэнэмиичэскэй былааннары ылыныыга, каадырдары бэлэмнээһиҥҥэ, о.д.а. улахан үлэни ыытар.
СӨ бастакы бэрэсидьиэнэ, судаарыстыбаннай сүбэһит Михаил Николаев тыл этэригэр бэрэстэбиитэлистибэ өрөспүүбүлүкэ сайдыытыгар улахан оруолун бэлиэтээтэ.
Дьоро киэһэни виртуоз-хомусчут Олена Уутай, Кыыл Уолун аатынан Национальнай үҥкүү тыйаатырын “Кыл Саха” ансаамбыла, Суорун Омоллоон аатынан Опера, алет тыйаатырын солистката Екатерина Корякина, Мариинскай тыйаатыр эдэр опернай ырыаһыттарын солиһа Григорий Чернецов, РФ норуодунай артыыһа Игорь Бутман, уо.д.а. киэргэттилэр.
Түмүккэ СӨ Бастайааннай бэрэстэбиитэлистибэтин гимнин аан бастаан толордулар. Өрөгөй ырыа тылларын Сергей Прачев уонна Валентина Комиссарова-Күлүмүрэ, матыыбын Николай Андросов суруйбуттар. Гимн ырыатын СӨ үтүөлээх артыыската Сахаайа уонна Мариинскай тыйаатыр солиһа Григорий Чернецов, РФ национальнай гвардиятын Ырыа-үҥкүү академическай ансаамбылын хора толордулар.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru