Ыраах Москваҕа айаннаан иһэр Өймөкөөн сылгыһыттарыттан биирдэстэрэ — Мичил Неустроев миинэн испит ата, Сунтаар, хараҕын эчэтэн, дойдутугар Саха сиригэр төннөргө күһэллибитэ.
Бэҕэһээ, муус устар 29 күнүгэр, уолаттар чугас табаарыстара, «Саха сирэ» хаһыат чэппиэрдээҕи нүөмэрин дьоруойа «Балыктаах граннаах сылгыһыта Ньургун» — Ньургун Габышев айанньыт Мичил Неустроев бүгүн Сунтаарын Мэҥэ Балыктааҕар аҕалбытын туһунан иһитиннэрдэ:
— Мичил Сунтаарынаан үс күн айаннаан кэллиллэр.
Ат баайыллан туран маска хараҕын улаханнык эчэппит. Хата, бастаан эппиттэрин курдук, хараҕа тэстибэтэх. Онон манна сайылатан, хараҕын эмтээн баран, дойдутугар Өймөкөөҥҥө ыытыахпыт. Москваттан төннөн иһэн доҕотторум Дугуйданнаах Мичил Сунтаардарын миэхэ кэлэн көрсөн барыахтара. Мичил атын туттараат, Дугуйданын эккирэттэ. Онон уолаттар Москваларыгар иккиэн тиийиэхтэрэ.
Дугуйдан Винокуров бу күннэргэ телеграмҥа Саха сирин олохтоохторун эҕэрдэлээн суруйда:
—— Төрөөбүт дойдум — Саха сирэ үбүлүөйдээх былааҕын Арассыыйа 5 эрэгэйиэнин устун киэн тутта өрө күөрэтэн иһэбит.
Ханна тиийбит сирбитигэр сайдыылаах Сахабыт сирин туһунан кэпсиибит. Былатыан Ойуунускай, Максим Аммосов, Исидор Барахов, Степан Аржаков курдук чулуу дьоммут Саха АССР төрүттэниитин туһугар турууласпыттарын мин бу күннэргэ киэҥ Арассыыйа устун айаннаан иһэн, киэн тутта саныыбын. Хаастаах уонна Хонор өйөбүллэринэн сыалбын ситиһэр соруктаах салгыы айаннаан иһэбин. Санаабыккыт барыта ситиһии арыалланнын, күндү бар дьонум! Уруй! Айхал!
Елена ПОТОЦКАЯ, «Саха сирэ» хаһыат.