Атырдьах ыйын 15 күнүгэр 2001-1980 с.т. эр дьоҥҥо уонна дьахталларга Москва чөмпүйэнээтэ түмүктэннэ. Күрэхтэһии «Измайлово» успуорт комплексыгар атырдьах ыйын 10 күнүттэн ыытыллыбыта. Бу туһунан sportyakutia.ru саайт иһитиннэрэр.
Быйылгы чөмпүйэнээккэ уопсайа 123 киһи кытынна: 29 дьахтар уонна 94 эр киһи.
49 киилэҕэ диэри ыйааһыҥҥа кыайыылааҕынан Саха сириттэн РФ успуордун маастара Борис Сидоров буолла. Борис манан Арассыыйа чөмпүйэнээтигэр кыттар быраабы ылла уонна хамаанданан күрэхтэһэргэ Арассыыйа Куубагар Москва сүүмэрдэммит хамаандатыгар киирдэ.
Оттон 75 киилэҕэ диэри ыйааһыҥҥа эмиэ биир дойдулаахпыт Назар Андреев үрүҥ көмүс мэтээли ылла. Финалга Мурад Рабадановтан хоттордо.
Чөмпүйэнээт кыайыылаахтара уонна призердара дипломунан, куубагынан уонна Арассыыйа буоксаҕа федерацияттыттан өйдөбүнньүк бэлэхтэринэн наҕараадаланнылар. Бастакы миэстэлээхтэр 100 тыһыынча солкуобайы, иккис миэстэлээхтэр 75 тыһыынча солкуобайы, үһүс миэстэлээхтэр 50 тыһыынча солкуобайы бириис туттулар.
edersaas.ru