Параакка 14 тыһыынча сулууспалаачччы кыттыаҕа, Кыһыл Болуоссат үрдүнэн 75 сөмөлүөт уонна бөртөлүөт көтүөҕэ.
Кыайыы 75 сылыгар анаммыт дойду сүрүн параада Москваҕа буолар. Колонна уонна тиэхиньикэ балтараа чаас устата парааттыахтара. Сэрии дьоруойдарыгар ытыктабылы биллэрэн, аатырбыт Т-34 тааҥка уонна СУ-100 ааһыахтара. Бу кэнниттэн аныгы байыаннай тиэхиньикэлэри көрдөрүөхтэрэ. Болуоссакка Арассыыйа аармыйатын таһынан 13 судаарыстыба аармыйата тэҥҥэ хаамыаҕа.
Кыайыы параада коронавирус пандемията туран, ыам ыйын 9 күнүттэн бэс ыйын 24 күнүгэр көспүтэ. Даатаны РФ Бэрэсидьинэ 1945 сыллаахха бу күҥҥэ сэриини кыайбыттар парааттара буолбутун иһин талбыта. Судаарыстыба баһылыгын быһаарыныытын уопсастыба өйөөбүтэ.
Параакка омук дойдутун лиидэрдэрэ, норуоттар икки ардыларынааҕы тэриллиилэр салайааччылара кыттыахтара. Ол курдук, Абхазия бэрэсидьиэнэ Аслан Бжания, Казахстан бэрэсидьиэнэ Касым-Жомарт Токаев, Киргизия бэрэсидьиэнэ Сооронбай Жээнбеков, Молдавия бэрэсидьиэнэ Игорь Додон, Сербия бэрэсидьиэнэ Александар Вучич, Таджикистан бэрэсидьиэнэ Эмомали Рахмон, Узбекистан бэрэсидьиэнэ Шавкат Мирзиеев, Соҕуруу Осетия бэрэсидьиэнэ Анатолий Бибилов ыалдьыттыахтара.
Москваҕа Кыайыы параадыгар сахалар эмиэ кытталлар. Билигин биллэринэн, түөрт уол баар. Ол курдук, ОМОН Станислав Голомарев аатынан анал оскуоланы туйгуннук бүтэрбит, билигин сулууспалыы сылдьар Мииринэйтэн Игорь Добровольскай параакка хаамыаҕа.
Маны сэргэ Сунтаартан төрүттээх танкист Денис Кырелов кыттыаҕа. Денис Читатааҕы байыаннай уокурукка сулууспалаан баран, билигин Таманскай мотострелковай дивизияҕа көһөрүллүбүтэ.
Амма улууһуттан сылдьар Николай Петров С.О.Макаров аатынан Тихоокеанскай үрдүкү байыаннай-морской училище 4-с кууруһун устудьуона кыттыаҕа. Николай утуму салҕааччы моряк буолар.
Өссө биир кыттааччы — Ким Слепцов. Ким Сэбиэскэй Сойуус Маршала С.М. Буденнай аатынан сибээс байыаннай академиятын оркестрын солиһа, Муусука Үрдүкү оскуолатын выпуснига буолар.
Параады 75 сөмөлүөт уонна бөртөлүөт Кыһыл Болуоссат үрдүнэн көтөн түмүктүөхтэрэ — Ми-26, түөрт Ми-8 бөртөлүөттэр, үс бөлөҕүнэн биэстии Ми-35, Ка-52, Ми-28 бөртөлүөттэр килииннии көтүөхтэрэ. Маны сэргэ 15 мүнүүтэни быһа уоттаах-күөстээх салют ытыллыаҕа.
Оттон Санкт-Петербург куоракка буолар параакка 4,8 тыһыынча киһи хаамара, 30 авиатиэхиньикэ кыттара күүтүллэр. Колоннаны 93 саастаах сэрии бэтэрээнэ Михаил Бибик хамаандалыаҕа.
edersaas.ru