«Moscow Open 2021» Бүтүн Арассыыйатааҕы турнирга Саха сирин спортсменнара кыайыы-хотуу көтөллөннүлэр.
Москва уобалаһыгар тохсунньу 21-23 күннэригэр ыытыллыбыт күрэс түһүлгэтигэр кикбоксердар (К-1) ситиһиилээхтик кытыннылар диэн СИА иһитиннэрэр.
Күрэскэ 19 спортсмен кыттыбыт. Петр Васильев, Иван Ле, Тимофей Сивцев чөмпүйүөн үрдүк аатын ылбыттар. Михаил Слепцов уонна Сергей Иванов үрүҥ көмүс, Павел Попов уонна Юлия Петрова боруонса призердарынан буолбуттар.
Сүрүн тириэньэр Андрей Алексеев салайааччылаах өрөспүүбүлүкэ кикбоксиҥҥа сүүмэрдиир хамаандата күрэхтэһиигэ диэри Дагестаҥҥа үөрэтэр-эрчиллэр сүүмэрдээһини ааспыт.
Спортсменнар дойдуларыгар кэлэн баран, Дьокуускайга олунньу 4-7 күннэригэр, Аан дойдуга ССРС бастакы чөмпүйүөнэ Александр Иванов кэриэһигэр Уһук Илиҥҥэ бастыыр иһин күрэхтэһиигэ кыттыахтара диэн суруллар. Бу турнир түмүгүнэн, Дьокуускайга муус устарга ыытыллыахтаах Арассыыйа чөмпүйэнээтигэр сүүмэрдээһин буолуохтааҕын бэлиэтииллэр.
«Moscow Open 2021» (К-1) Бүтүн Арассыыйатааҕы турнир кыайыылаахтара уонна призердара: 1. Петр Васильев 51 кг — 1 миэстэ. 2. Иван Ле 54 кг — 1 миэстэ. 3. Тимофей Сивцев 57 кг — 1 миэстэ. 4. Михаил Слепцов 51 кг — 2 миэстэ. 5. Сергей Иванов 54 кг — 2 миэстэ. 6. Павел Попов 63,5 кг — 3 миэстэ. 7. Юлия Петрова 56 кг — 3 миэстэ.
+1
+1
+1
+1
+1
+1
+1