Коронавирус пандемията туран ыччат сайыҥҥы тэрээһиннэрэ онлайн уонна оффлайн формакка көспүттэрэ. Сахабыт сирин көхтөөх ыччата тэйиччиттэн олорон араас хабааннаах форумнарга кыттар.
Атырдьах ыйын 3-9 күннэригэр Василина Лукина Бүтүн Арассыыйатааҕы «Территория смыслов» форумҥа «Политика и сетевые лидеры» диэн хайысхаҕа кытынна. Бу форумҥа онлайн, оффлайн уонна «цифровой аватар» быһыытынан кыттыахха сөп.
«Мин «цифровой аватар» форматынан кытынным. Манна уратыта диэн кыттааччыга «мастер-участник» диэни холбууллар, оччотугар кини нөҥүө этиилэргин киллэриэххин, эспиэрдэртэн арааһы ыйытыаххын сөп. Тэрийээччилэр буостанан футболка уонна мааска ыыппыттара. Форум онлайн үрдүк таһымнаахтык ыытыллан, илэ сылдьыбыт курдук сананным,» — диэн Василина кэпсиир.
Бу күннэргэ «Восток» диэн Уһук Илиҥҥи форум буола турар. Манна СӨ Ыччат бырабыыталыстыбатыттын түөрт ыччат кытта сылдьар. Андрей Сосновскай «МИР: молодежная инициатива региона» диэн ыччат көҕүлээһиннэрин, сонун санааларын түмэр бырайыактаах кыттар. Бырайыак 2019 сылтан үлэлиир. Мантан түмүллүбүт 120 көҕүлээһини «Народный правотворец» куонкуруска тиксэрбиттэрэ.
Андрей Сосновскай этэринэн, бэҕэһээ бырайыагы көмүскээбиттэр, эспиэрдэр хайҕаабыттар. Бэнидиэнньиккэ финал буолуоҕа.
edersaas.ru