Молодо бульдозериһа

Бөлөххө киир:

1959 сыллаахха Г.Ф.Дорганов салайааччылаах геологическай этэрээт Анаабырга Молодо диэн сиргэ бастакы алмаастары булбуттара. 1994 сылтан «Нижнеленское», онтон “АЛРОСА” хампаанньа иһинэн “Анаабыр алмаастара” манна алмааһы хостоон барбыттара. Манна олохтоох дьонтон элбэх киһи үлэлиир.

Амма улууһун Бөтүҥүттэн төрүттээх Дмитрий Давыдов автотранспортнай лиссиэйи бүтэрэн, дойдутугар тырахтарыыстаан баран, Нерюнгри оройуонугар “Нуринган” артыалга бульдозериһынан үлэлээбитэ. 2009 сыллаахха “Нижнеленскэй” хампаанньа геологическай баартыйатыгар “Комацу Д65” бульдозер машиниһынан үлэҕэ киирбитэ.

2019 сыллаахха “Маят” бириискэ Морҕоҕор учаастагар “Бастыҥ бульдозерист” аатын ылбыта. Быйыл Молодо учаастагар 2-с миэстэни уонна бульдозерит саамай үрдүкү, 8-с разрядын ылбыта. Онон кини тарбахха баттанар бастыҥ үлэлээх уонна улахан уопуттаах бульдозерист буолар.

50-60 кыраадыстаах тымныыга тиэхиникэ алдьаннаҕына, бүтүн үлэ күнэ халтайга ааһар. Онон олус уустук үлэ буолар. Киниэхэ аҕа табаарыстара, уопуттаах бульдозеристар Д.Н. Софронеев, А.Г. Обертайло сүбэ-ама, күүс-көмө буолбуттарын махтана ахтар.

3-4 ый устата баахтанан үлэлиир кэмнэригэр уолаттар спортивнай күрэхтэһиилэри ыыталлар, култуурунайдык да сынньаналлар. Балыктыылларын, баанньыктаналларын, теннистииллэрин сөбүлүүллэр. Ыһыах кэмигэр “Молодо Боотура” диэн күрэскэ бульдозеристар Михаил Лотов, Василий Туманов, Виктор Туманов абсолютнай чөмпүйүөн буолбуттара.

Остолобуойга олус бэркэ аһаталлар, бибилэтиэкэ кинигэ арааһа баар. Онон күүстээх үлэ кэнниттэн сынньанарга, алтыһарга үчүгэй усулуобуйа баар. Дмитрий этэринэн, кэлэр сылтан производственнай көрдөрүүлэри өссө улаатыннарар былааннаахтар. Үчүгэйдик, кыайа-хото үлэлиир киһи хамнаһа да үгүөрү, олоххо да ситиһиилээх, хотуулаах буолар.

+1
0
+1
0
+1
0
+1
0
+1
0
+1
0
+1
0