«Мой друг Гамлет» испэктээкил «Кыһыл көмүс мааска» бириэмийэҕэ киирдэ

Бөлөххө киир:

Ойуунускай аатынан Саха академическай тыйаатырга режиссер Сергей Потапов туруорбут «Мой друг Гамлет» диэн испэктээкилэ “Кыһыл көмүс мааска” бэстибээл театральнай бириэмийэтигэр түөрт номинацияҕа киирдэ.


Ол курдук, “Драмаҕа бастыҥ испэктээкил. Улахан кээмэй”, “Драмаҕа режиссер бастыҥ үлэтэ”, “Драматическай тыйаатырга худуоһунньук бастыҥ үлэтэ”, “Драматическай тыйаатырга көстүүмнэри оҥорор худуоһунньук бастыҥ үлэтэ” номинацияларга киирдэ.

“Кыһыл көмүс мааска” бириэмийэ 2019 сыллааҕы номинаннарын экспертэр сэбиэттэрэ талан ылла. Кинилэр 2017-2018 сыллар премьераларын кэтээн көрбүттэр. Барыта 791 испэктээкилтэн талан ылбыттар. Сороҕор 100-тэн тахса куоракка анаан-минээн тиийэн, сороҕор видеонан көрбүттэр. Дьокуускайга экспертэр сэбиэттэрэ алтынньы ортотугар кэлэн, «Гиганты горы» уонна  «Мой друг Гамлет» испэктээкиллэри сыаналаабыта.

2019 сылга “Көмүс мааска” үбүлүөйдээх 25-с сыла. Кулун тутар 10—муус устар 15 күннэригэр Москваҕа ыытыллыа. Муус устар 16 күнүгэр түмүк тахсан, бириэмийэлэри туттартыахтара.

Санатар буоллахха, Гамлет оруолун — Роман Дорофеев, Гертруданы – Жанна Ксенофонтова, Полонийы — Иннокентий Луковцев, Лаэрты — Геннадий Турантаев, Офелияны — Айталина Лавернова, Горационы — Валентин Макаров, уо.д.а. оонньообуттара.

Ангелина ВАСИЛЬЕВА, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0