Сунтаарга чугаһынан саамай ыраас уонна кыһыннары, сайыннары иһэр уунан хааччыйар күөл Мохсоҕоллоох. Бу күөл ураты харыстанар сир. Ол да иһин олохтоох дьон мантан муус ылыыны сөбүлээбэттэрин биллэрэллэр.
edersaas.ru,
— 2014 сыллаахха Күндэйэ депутаттарын сессияларынан бу Мохсоҕоллоох күөлэ ураты харыстанар күөл аатын ылбыта. Ол да иһин манна сөтүөлүүр, муус ылар бобуллар. Ону ол диэбэккэ биирдиилээн дьон, ону кытта мууһунан эргинээччилэр күннэтэ кэлэн мууһу ыла тураллар. Бу күөлтэн кыһыннары-сайыннары Сунтаар уонна Элгээйи өттүнээҕи нэһилиэктэр иһэр ууланан олороллор. Урукку кэмҥэ мантан муус ылыыта суох буоллаҕына, бу икки сыл иһигэр хас хардыы аайы муус ылбыт оннулара сыталларын көрөҕүт. Билигин өрүстэн муус ылар киһи тарбахха баттанар. Буолумуна, Эбэбит киртийбитин кэннэ ким да чугаһыан баҕарабат. Ол эрээри эколоктар сүбэлииллэринэн Мохсоҕоллооххо тэҥнээх муус ылыахха сөптөөх күөллэр бааллар. Мохсоҕоллоохтон муус ылааччылар төһө да арыытын сүөккээн ыраас дружбанан ылабыт диэтэллэр, тимир көлө күөлгэ киириитэ, үлэ дьоно силлээн, табахтаан, сүөккэнэн бараллара барыта күөлгэ иҥэр буоллаҕа. Онон доҕоттор ураты харыстанар күөлбүтүн харыстыаҕыҥ диэн ыҥырабын, — диэн улуус депутата Мария Кобельянова кэпсээтэ.
Бу күннэргэ М.В.Кобельянова ураты харыстанар күөлү харыстыырга ыҥыран баннер оҥотторон Күндэйэ баһылыгар Иван Константиновка туттарда. «Мохсоҕоллоох күөлүн харыстыаҕыҥ ыҥырыыны кытаатан сөпкө өйдүүргүтүгэр. Көрөҕүт соҕотох кыһыннары-сайыннары иһэр, ыраас уубут кэрэ сирэ сайын өттүгэр бөҕүнэн туолар, кыһын өттүгэр дэлби тэпсиллэр. Дьиҥинэ кырдьык атын күөллэр элбэхтэр. Ону туһаныахха! Барыны бары күчүмэҕэйдээн диэххит эрээри иһэр уу — олохпут суолтата, туруга. Олохтоох дьон бу икки сыл иһигэр биллэ киртийбит диииллэрин өйдүөҕүҥ! Үксэ мин көрөрбүнэн мантан ылан атыылыыллар быһылаах, бу ууну оттон бэйэбит иһиэхпит турдаҕа… Манна тимир көлөннөн киирии, табахтаан баран тобоҕу быраҕыы, силлии, сүөккэнэ сылдьыы барыта күөлгэ иҥэрин эмиэ толкуйдуоҕуҥ! Аҥардас манна биирдэ киирэн тахсаары икки оннук түгэни илэ харахпынан көрбүт киһи санаабын үллэстэбин!, -диэн Мария Васильевна эбэн эттэ.
edersaas.ru