Быйыл 10-с төгүлүн Чурапчы улууһун уһуйааннарын икки ардыларыгар «Мохсоҕол» байыаннай-спортивнай күрэхтэһии ыытылынна.
Үгэс быһыытынан, сыл аайы Аҕа дойдуну көмүскээччи күнүн иннинэ буолар бу күрэхтэһиигэ детсаадтар улахан бөлөхтөрүн уолаттара кытталлар.
Онон, быйыл эмиэ, олунньу 20 күнүгэр, улуус киинигэр Чурапчыга А.К.Софронов аатынан култуурунай-спортивнай кииҥҥэ нэһилиэктэртэн 15 хамаанда — 115 оҕо кэлэн күрэхтэстэ.
Бу “Мохсоҕол” байыаннай-спортивнай күрэхтэһиини көҕүлээччинэн, тэрийээччинэн Чурапчытааҕы “Кэскил” уһуйаан буолар.
«Кэскил» уһуйаан физкультураҕа инструктора Ольга Ложкина (Слепцова) уонна уһуйаан методиһа Анна Шарина бырайыак оҥороннор, бу күрэхтэһиигэ маҥнай Чурапчы сэлиэнньэтин иһинээҕи уһуйааннар кыттыбыттара, онтон улуустааҕы Үөрэх управлениетынан биһирэнэн, улуус үрдүнэн ыытыллар буолбута. Эппиппит курдук, быйыл хайыы — үйэҕэ 10-с сыла.
Күрэхтэһии былааҕын “Кэскил” уһуйаан иитиллээччилэрэ, бырайыак ааптара, саҕалааччыта О.А.Ложкина көтөхтүлэр. Хамаандалары, тэрийээччилэри күрэхтэһии саҕаламмытынан истиҥник эҕэрдэлээн, улуустааҕы Үөрэх управлениетын начаалынньыга Тамара Васильевна Павлова тыл эттэ.
Күөн көрсүһүү I түһүмэҕэр строевой көрүү, II түһүмэҕэр эстафета (10 этээптээх моһоллордоох сүүрүү) буолла. Тыҥааһыннаах, интэриэһинэй киирсии кэнниттэн «Мохсоҕол-2018» Х улуустааҕы байыаннай-спортивнай оонньуу уопсай түмүгэ таҕыста.
Кыайыылаах хамаандалар
I – “Мичил” Чурапчы
II – “Күнчээн” Одьулуун
III – “Ньургуһун” Хатылы
“Бастыҥ хамандыыр”
I — Макаров Коля, “Мичил” Чурапчы — Байыаннай хамсааһын бэтэрээннэрин түмсүүтүн бирииһэ
II — Кривошапкин Айаан, “Ыллык” Дириҥ
III — Оконешников Айсен, “Улыбка” Чурапчы
“Бастыҥ форма”
I – “Туллукчаан” Чурапчы – “Кэскил” д/с «Эркин» Аҕа түмсүүтүн бирииһэ
II – “Кэскил” Чурапчы
III – “Күнчээн” Хайахсыт
МКУ, УО номинациялара
“Бравые солдаты” – “Мичил” Хадаар
“Кыайыыга дьулуурун иһин” – “Ымыы” Мындаҕаайы
Бастаабыт хамаанда кубогынан, грамотанан, хас биирдии чилиэнэ мэтээлинэн, анал бириистэринэн наҕараадаланнылар. Бириистээх миэстэни ылбыттар эмиэ кубок, грамота, мэтээл, бириис туттулар.
Маны таһынан, быйыл бэлиэ даата буолан, уһуйааннар салайааччылара, физкултуурунай тэрийээччилэр, иитээччилэр улахан бөлөхтөрө 10-с төгүлүн ыытыллар күрэхтэһиини тэрийиигэ кылааттарын иһин улуус баһылыгын, үөрэх управлениетын, Чурапчы нэһилиэгин дьаһалтатын Бочуотунай грамоталарынан, бэлэхтэринэн наҕараадаланнылар.
Уол оҕону иитиигэ туһуланар дьаһал быйылгы 10 сыллаах тэрээһининэн, улуус, нэһилиэк аҕаларын, эр дьоннорун уопсастыбаннай тумсуулэрэ кытыннылар, анал бириистэри туруордулар.
Дьүүллүүр сүбэҕэ Чурапчы улууһунааҕы байыаннай патриотическай хамсааһын салайааччыта, мусуой дириэктэрэ, полковник Семен Иванович Никитин бэрэссэдээтэллээтэ. Чилиэннэр — Иван Петрович Лукин, Чурапчытааҕы үөрэх салаатын сүрүннүүр исписэлииһэ, СӨ үөрэҕириитин туйгуна уонна Александр Романович Неустроев, Чурапчытааҕы уопсай спорт сайдыытын начаалынньыгын солбуйааччы.
— «Мохсоҕол» күрэхтэһии уол оҕону төрөөбүт дойдуну таптыырга, харыстыырга, кинини көмүскээччи, араҥаччылааччы тыыныгар иитэринэн ураты суолталаах.
Бу күрэххэ оҕолор бэйэлэрин бэлэмнэрин, кыайыыга дьулуурдарын көрдөрөллөр, саастыылаахтарын кытта кыахтарын тургутуһаллар. Физкултуурунай салайааччылар уопуттарын атастаһаллар, сатабылларын көрдөрөллөр.
Курэхтэһэр хамаанда ахсаана сылын ахсын эбиллэ, кыттааччытын бэлэмэ тупса, хаачыстыбата үрдүү турара, бииртэн-биир, саҥаттан-саҥа хамаанда кыайыыны ситиһэрэ, «Мохсоҕол» күрэхтэһии туруоруммут сыалын — соругун таба тутуһан иһэрин туоһулуур, — диэтэ күрэхтэһиини тэрийээччи “Кэскил” уһуйаан сэбиэдиссэйэ Анастасия Григорьева.
Татьяна МАРКОВА, «Саха сирэ» хаһыат, edersaas.ru