Коронавирус дьаҥар сутуллубут ыарыһахтары эмтиир мобильнай биригээдэлэр үлэлэрин хааччыйыыга 127,6 мөл солкуобай бэриллиэҕэ. Бу туһунан дьаһалга Арассыыйа Бырабыыталыстыбатын Бэрэссэдээтэлэ Михаил Мишустин илии баттаата.
Маннык быраактыка кэккэ сирдэргэ-уоттарга туһаныллар. Федеральнай мэдиссиинэ тэрилтэлэриттэн уонна үрдүк үөрэх идэтийбит кыһаларыттан исписэлиистэр уустук балаһыанньалаах эрэгийиэннэргэ көмөҕө бараллар. Кинилэр миэстэтигэр ыарыһахтары көрөллөр уонна ыарыһахтарга көмөлөһөллөр. Биригээдэ иһигэр араас идэлээх быраастар бааллар: анестезиолог-реаниматологтар, инфекционистар, пульмонологтар, кардиологтар, терапевтар.
Бу үлэҕэ мэдиссиинэ 32 тэрилтэтэ кыттар. Кинилэр истэригэр – Пирогов аат. Национальнай медико-хирургическай киин, Бакулев аат. Сүрэх-тымыр хирургиятын мэдиссиинэ-чинчийэр киинэ, Кардиология Национальнай мэдиссиинэ чинчийэр киинэ, Кулаков аат. Акушерства уонна гинекология мэдиссиинэ киинэ, Башкирия судаарыстыбаннай мэдиссиинэ университета.
Федеральнай үбүлээһин исписэлиистэр хамнастарын уонна командировкаҕа ороскуоттарын төлүүргэ туһаныллыаҕа.Үп Бырабыыталыстыба саппаас пуондатыттан киириэҕэ. Былырыын бу сыалга 200 мөлүйүөн солкуобай туһаныллыбыта.
РФ Бырабыыталыстыбатын саайтыттан
Бэлэмнээтэ Женни Стрюкова
Хаартыска: интэриниэт