Бүгүн, балаҕан ыйын 26 күнүгэр, күнүс 12 чаастан, ытык Баайаҕа томторун килбэйэр киинигэр, өбүгэ үгэһин тарҕатар, саха норуотун түмэр Туос Моҕол ураһа аанын арыйар өрөгөйдөөх күнүн уруйдаан, Саха сирин үрдүнэн оһуохай дуорайда.
Таатта улууһуттан норуот айымньытын дьиэтин фольклору сүрүннүүр исписэлииһэ Майя Егорова иһитиннэрбитинэн, куйаар ситимининэн сиэттиһиннэрэн ZOOM сыһыарыынан тэриллибит сомоҕолоһуу оһуохайыгар өрөспүүбүлүкэ араас муннуктарыттан өрөйөн-чөрөйөн, үөрэн-көтөн туран кыттыбыттар. Манна бааллар Тааттаттан, Чурапчыттан, Амматтан, Мэҥэ Хаҥаластан, Намтан, Уус Алдантан, Сунтаартан, Ньурбаттан, Үөһээ Дьааҥыттан, Үөһээ Бүлүүттэн, Муоматтан, Дьокуускайтан. Бу сүргэни уратытык көтөҕөр үөрүүлээх күн оһуохайга ыраахтан ааттаан-суоллаан Саха сирин уопсастыбаннай палаататыттан, өрөспүүбүлүкэтээҕи норуот айымньытын дьиэтиттэн, Дьокуускайдааҕы култуура кэллиэһиттэн, муусука кэллиэһиттэн, «Оһуохай» түмсүүттэн, Мархаттан, Туймаада хочотуттан «Таатта» түмсүү кыттыылаахтара, уо.д.а. кыттыбыттар.
Долгутуулаах, үөрүүлээх түһүлгэҕэ болҕомтону тардар, киһини сэргэхситэр, сүргэни уратытык көтөҕөр оһуохайы СӨ үтүөлээх этээччитэ, алгысчыт Афанасий Попов таһаарбыт. Туос Моҕол ураһа уран тылынан туойуллубут, кэрэ тылынан кэрэхсэммит, уруй-айхал этиллибит, алгыс баһа сыаламмыт.
