Бүгүн ытык Таатта сиригэр-уотугар, кэрэ-мааны Баайаҕаҕа, дьон-сэргэ өр кэмҥэ долгуйа күүппүт Моҕол ураһатын арыйыы үөрүүлээх кэрэ-бэлиэ түгэнэ буолла.
Бу бэлиэ түгэн үөрүүтэ хас эмэ бүк үрдээтэ. Туос Моҕол ураһаны арыйыы умнуллубат күнүгэр СӨ Духуобунаһын академиятын академигар, СӨ култууратын үтүөлээх үлэһитигэр, Былатыан Ойуунускай аатынан Судаарыстыбаннай бириэмийэ лауреатыгар, норуот ытыктыыр, сүгүрүйэр ууһугар Борис Федорович Неустроевка — Мандар Ууска «Саха Өрөспүүбүлүкэтин Бочуоттаах гражданина» диэн бочуоттаах аат иҥэрилиннэ.
СӨ Ил Дархана Айсен Николаев Мандар Уус өр сыллаах сыралаах үлэтин үрдүктүк сыаналаата, махтанна. Салгыы түһүлгэҕэ тоҕуоруһа мустубут бар дьоҥҥо туһаайан: «Былыргылыы ньыманан оҥоһуллубут дьиҥнээх Моҕол ураһа баар буолла. Бу ытык киһибит Борис Федорович сатабыллаах салалтатынан, мындыр толкуйунан, көҕүлээһининэн, норуоту туруоруутунан тутулунна. Туос Моҕол ураһа — Мандар Уус өр сылларга иитиэхтээбит улахан ыра санаата, — диэн киэн туттан туран эҕэрдэлээтэ. Ураһаны тигиигэ уонна оҥорон туруорууга барыта 20 улуус кыттыбытын бэлиэтээтэ. Саха култууратын сүдү тутуута — Туос Моҕол ураһа ытык Таатта сиригэр Саха Өрөспүүбүлүкэтин Судаарыстыбаннаһын күнүн көрсө уонна Улуу Кыайыы 75 сылынан арыллыбыта үрдүк суолталааҕын тоһоҕолоон эттэ.
Мандар Уус бар дьоҥҥо туһаайан, 75 сааһын туоларыгар тапталлаах Сахатын сирин дьоно-сэргэтэ түмсэн, сомоҕолоһон, көмөлөөн, кини уруккуттан баҕарбыт баҕатын, ыра санаатын толороругар көмөлөспүттэригэр, Моҕол ураһа оҥоһуллан, силигэ ситэриллэн олоххо киирбитигэр махтанна. «Бу Моҕол ураһаны тигиигэ, оҥорууга тарбахтарыгар талааннаах 300 маастар өрөспүүбүлүкэбит улуустарыттан кытынна. Мин кинилэри барыларын оҕолорум курдук чугастык, истиҥник саныыбын. Өйөбүлгүтүгэр, көмөҕүтүгэр барҕа махталбыт тиэрдэбин», — диэтэ.
Тоҕус миэтэрэ үрдүктээх Моҕол ураһа Мандар Уус бырайыагынан оҥоһуллар этнокултуура комплексын сиригэр-уотугар турар. Манна салгыы саха балаҕана уонна уус түмэлэ туттуллаллара былааннанар. Оттон бүгүн ыалдьыттар астына, сөҕө быыстапка бэртээхэйин көрдүлэр.
Хаартыскаларга Андрей Сорокин (СИА) түһэриилэрэ.