Хотугу многоборьеҕа Анна Кинчак уонна Петр Охлопков өрөспүүбүлүкэ саҥа рекортарын олохтоотулар
Бу күннэргэ Дьокуускайга түмүктэммит РФ үтүөлээх тутааччыта Виктор Ефимов кэриэһигэр регионнар икки ардыларынааҕы хотугу многоборьеҕа күрэхтэһиигэ 16-17 саастаах уолаттар уонна кыргыттар ортолоругар өрөспүүбүлүкэ икки рекорда олохтонно. edersaas.ru
Ол курдук, сүгэни кыыратыыга Нерюнгриттан Анна Кинчак бу сайын Манчаары оонньууларыгар олохтообут рекордун (93 м 70 см) тупсарда. Мантан антах Саха сирин чулуу көрдөрүүтэ 101 миэтэрэҕэ тэҥнэһэр.
Оттон Петр Охлопков (Чурапчы) 600 наартаны ойон эмиэ Манчаары оонньууларыгар олохтообут рекордун (523 наарта) тупсарда.
Быйылгы куоталаһыыга 12 хамаандаттан 95 спортсмен күрэс былдьаста.
Эр дьоҥҥо биэс көрүҥтэн үһүгэр (үстэ төхтөрүйэн ыстаныыга, сүгэни кыыратыыга, арканы быраҕыыга) бастаабыт Андрей Шарга (Нерюнгри) абсолютнай чөмпүйүөнүнэн буолла. Чурапчытааҕы институт устудьуона Алексей Созонов — иккис, Павел Егоров (Үөһээ Бүлүү) үһүс миэстэлэргэ таҕыстылар.
Дьахталларга Илона Винокурова (Нерюнгри) бастаата. Пелагея Григорьева (Үөһээ Бүлүү), Дария Соколова (Мэҥэ Хаҥалас) иккис, үһүс буоллулар.
16-17 саастаах уолаттарга, кыргыттарга Мичил Лазарев (Үөһээ Бүлүү), Александр Филиппов (Нерюнгри), Петр Охлопков (Чурапчы), Анна Кинчак, Лидия Тыщук (Нерюнгри), Анастасия Нюкканова (Үөһээ Бүлүү) миэстэлэстилэр.
12-13 саастаахтарга кыргыттар ортолоругар Ванесса Морфунова (Үөһээ Бүлүү) кыахтаахтык бастаата. Кини 30 см үрдүктээх 300 наартаны ойбутун бэлиэтиэххэ сөп. Уолаттарга Богдан Чупышев (Нерюнгри) үстэ төхтүрүйэн ыстаныыга 6 м 61 см, түһүүлээх-тахсыылаах биир биэрэстэҕэ сүүрүүгэ – 3 мүн. 46 сөк. көрдөрүүлэннэ.
14-15 саастаахтарга Данил Иванов (Үөһээ Бүлүү) наартаны ойууга, Николай Петров (Чурапчы) сүгэни быраҕыыга тэҥнээхтэрин булбатылар.
Роман Попов, «Саха сирэ» хаһыат, edersaas.ru