Муус устар 1 күнүттэн социальнай биэнсийэ 7,7% үрдүүрэ күүтүллэр. Маннык үрдээһин сыл аайы буолар, холобур, былырыын социальнай биэнсийэ 3,4% индексацияламмыта. Социальнай биэнсийэни инбэлииттэргэ, иитэр-аһатар төрөппүтэ суох хаалбыт оҕолорго, үлэ ыстааһа тиийбэтэх дьоҥҥо (дьахталларга – 65, эр дьоҥҥо 70 саастарыттан ананар) биэрэллэр. Индексация түмүгүнэн, муус устар 1 күнүттэн социальнай биэнсийэ кээмэйэ 11 тыһыынча солкуобайга диэри үрдүөҕэ.
Ийэ хапытаала уонна да атын төлөбүрдэр
Быйыл ийэ хапытаала олунньу 1 күнүттэн үрдүүрэ былааннанар. Ааспыт сылга ийэ хапытаала бастакы оҕоҕо 483 881 солк. этэ, иккис уонна үһүс оҕоҕо 639 431 солк. быһыллыбыта. Олунньуга ийэ хапытаалын таһынан, атын социальнай төлөбүрдэр үрдүөхтэрэ. Холобур, оҕону 1,5 сааһыгар диэри көрөн олорууга босуобуйа алын кээмэйэ улаатыахтаах. Билигин 7083 солкуобай эбит буоллаҕына, кэлэр ыйтан 5,8% үрдээн, 7493 солкуобайга тэҥнэһиэхтээх. Оттон туһааннаах босуобуйа муҥутуур улахан кээмэйэ 31283 солкуобайынан ааҕыллар.
Росстат чахчыларынан, 2021 сыл түмүгүнэн инфляция хаамыыта 8,39% тэҥнэспит.
Балаҕан ыйыттан босуобуйаны ылыы судургутуйуо
Аны күһүҥҥүттэн, балаҕан ыйын 1 күнүттэн, социальнай өйөбүл сорох миэрэлэрэ аҥаардас сайабылыанньанан эрэ, ыспыраапката суох ананар буолуохтара. РФ үлэҕэ уонна социальнай харысхалга миниистирэ Антон Котяков «Российская газетаҕа” иһитиннэрбитинэн, судаарыстыбаттан көмөнү ылыы быдан судургутуйуоҕа, холобур, ийэ хапытаала оҕо төрөөтүн кытта тута ананыаҕа.
Электроннай «больничнайга» көһүү
2017 сылтан өрөспүүбүлүкэҕэ “Электроннай больничнай” бырайыак олоххо киирэн, мэдиссиинэ тэрилтэлэрэ электроннай көрүҥүнэн больничнай лиистэри толорор буолбуттара. 2022 сыл тохсунньу 1 күнүттэн больничнай лиистэри кумааҕыга суруйуу номнуо тохтоон, быраастар электроннай көрүҥүнэн эрэ суруйар буоллулар.
Оҕолоох ыаллар нолуоктан босхолоноллор
Былырыын РФ Аҕа баһылыга Владимир Путин Нолуок кодексын 217-с ыстатыйатыгар уларытыылары киллэрбитэ. Ол курдук иккиттэн элбэх оҕолоох ыаллар дьиэлэрин атыылыылларыгар НДФЛ нолуогуттан босхолонор буолбуттара. Ол гынан баран манна кэккэ ирдэбиллэр бааллар: нолуогу төлөөччүлэр иккиттэн аҕыйаҕа суох, 18 саастарын туола илик (күнүскү үөрэххэ үөрэнэр буоллахтарына, 24 саастарын туола илик) оҕолордоох төрөппүттэр буолуохтаахтар; дьиэлэрин атыылаан баран, олорор усулуобуйаларын тупсарар сыалтан, ол сылга (эбэтэр, кэлэр сыл муус устар 30 күнүттэн хойутаабакка) саҥа дьиэни ылыахтаахтар; дьиэни өлүүлэһэн тутуу дуогабарынан ылыллыбыт буоллаҕына, ол дуогабарынан төлөбүр толору ааһыахтаах; саҥа дьиэ уопсай иэнэ уонна кадастровай сыаната атыыламмыт дьиэ гиэнинээҕэр улахан буолуохтаахтар; атыыламмыт дьиэ кадастровай сыаната 50 мөлүйүөн солкуобайтан ыарахан буолуо суохтаах.
ОДьКХ тарыыптара
2022 сыл иккис аҥаарыттан хомунаалынай өҥөлөр тарыыптара 2,9 %-тан 6,5%-ҥа диэри үрдүөхтээхтэр. Холобур Свердловскай уобаласка 2,9%, Марий Элга 3,2% уонна Чукоткаҕа 3,3% диэри улаатара күүтүллэр. Саамай улахан үрдээһин Чечняҕа (6,5%), Санкт-Петербурга (6,3%), Севастопольга, Крымҥа уонна Татарстаҥҥа (6,2%) итиэннэ Москваҕа, Саха сиригэр уонна Дагестаҥҥа (6%) буолуоҕа.
edersaas.ru
Хаартыска: www.advgazeta.ru