Бу күннэргэ спортивнай тустуу федерациятын бырабылыанньата мунньахтаан, 2019 сыл тэрээһиннэрин былаанын бигэргэттэ.
Олортон сүрүн-сүрүннэриттэн билиһиннэрдэххэ, кулун тутар 1-3 күннэригэр Нерюнгригэ Уһук Илин уокурук чөмпүйэнээтэ ыытыллыаҕа. Манна быйылгыттан Бурятия, Забайкалье күүстээх хамаандалара кытталларынан, күрэс күүрээннэнэрэ сабаҕаланар.
Сааскы бастакы ый 7-10 чыыһылаларыгар киин куоракка олимпийскай чөмпүйүөн Роман Михайлович Дмитриев кэриэһигэр көҥүл тустууга үгэс буолбут норуоттар икки ардыларынааҕы турнир былааҕа көтөҕүллүөҕэ. Бэлиэтээн эттэххэ, бу уолаттар ортолоругар Арассыыйа сиригэр-уотугар ыытыллар соҕотох норуоттар икки ардыларнааҕы түһүлгэнэн буолар.
Онтон нөҥүө нэдиэлэтигэр тустууну сэҥээрээччилэр тэһийбэккэ-тулуйбакка күүтэр сабыытыйалара буолуоҕа – улуу Туймаада килбэйэр киинигэр аан дойду Кубога аан бастаан түһүлгэлэнэн, өрөспүүбүлүкэ спордун устуоруйатыгар саҥа страницаны суруйуоҕа.
Кулун тутар эргэтигэр “Саха сирин тимир суоллара” АУо бирииһигэр кыра уолаттар ортолоругар олимпийскай чөмпүйүөн Павел Пинигин аатынан өссө биир норуоттар икки ардыларынааҕы күрэхтэһии буолуоҕа. Ый 28-31 күннэригэр Николай Тарскай кэриэһигэр Саха сирин чөмпүйэнээтэ ыытыллара былааннанар. Буолар сирин кэлин быһаарыахтара.
Улахан түһүлгэлэри ылан көрөр эбит буоллахха, Европа чөмпүйэнээтэ быйыл муус устар 8-14 күннэригэр Румыния киин куоратыгар Бухареска буолуоҕа.
Сыл биир улахан эппиэттээх күрэхтэһиитэ – аан дойду чөмпүйэнээтэ балаҕан ыйын 14-22 күннэригэр Астанаҕа (Казахстан) ыытыллыаҕа. Онно Токиотааҕы Олимпийскай оонньууларга кыттарга путевкалар оонньонуохтара.
Оттон Арассыыйа сүрүн түһүлгэтэ билиҥҥитэ бэс ыйыгар буолара эрэ биллэр, чыыһылата, ханна ыытыллыаҕа чопчу быһаарылла илик.
Саха АССР, РСФСР, ССРС үтүөлээх тириэньэрэ Дмитрий Петрович Коркин кэриэһигэр норуоттар икки ардыларынааҕы турнир аан дойду ааттаахтарын алтынньы 10-13 күннэригэр Туймаадаҕа мунньуоҕа.
Роман ПОПОВ, «Саха сирэ» хаһыат, edersaas.ru