Спорт национальнай көрүҥнэригэр 2019 сыл бастакы аҥарын уон улахан күрэхтэһиитин кытта билиһиннэрэбит.
Үгэс быһыытынан, сылы “Хаҥалас хапсаҕайа” турнир арыйыаҕа. Өрөспүүбүлүкэ таһымнаах күрэс Хаҥалас улууһун киинигэр — Покровскайга олунньу 2-3 күннэригэр буолуоҕа.
Сахалыы атах оонньуутугар “Антипов мемориалын” былааҕа быйыл уон биирис төгүлүн көтөҕүллүөҕэ. Бу үтүө үгэскэ кубулуйбут норуоттар икки ардыларынааҕы күрэс Бакуга (Азербайджан) олунньу 14-18 күннэригэр ыытыллар.
Сылтан сыл киэҥ сэҥээриини ылар SAKHA ARENA турнир быйыл Дьокуускайга, “Кыайыы 50 сыла” Спорт дыбарыаһыгар Аҕа дойдуну көмүскээччи күнүгэр – олунньу 23-гэр буолуоҕа. Манна үгэс курдук 75 киилэҕэ уонна 95 киилэҕэ диэри ыйааһыннаах хапсаҕайдьыттар күөн көрсүөхтэрэ.
Дыгын оонньууларын сэттэ төгүллээх кыайыылааҕа Иван Белолюбскай бирииһигэр национальнай многоборьеҕа “Чөмпүйүөн Кубога” быйыл олунньу 16-17 күннэригэр алтыс төгүлүн ыытыллыаҕа.
Валерий Пантелеймонович Кочнев бирииһигэр өрөспүүбүлүкэтээҕи күрэс атах оонньуутун маастардарын кулун тутар 2 күнүгэр Дьокуускайга мунньуоҕа. Онно бүгүҥҥү күҥҥэ Саха сирин бары күүстээх спортсменнара кытталлара күүтүллэр.
2019 сылга аан дойду саамай күүстээх мадьынытынан ким буоларын Эр-Риядка (Саудовскай Аравия) буолар күрэхтэһиигэ билиэхпит. Мас тардыһыытыгар аан дойду муҥутуур кыайыылааҕын быһаарар күрэс барыллаан кулун тутарга ыытыллара былааннанар.
Петр Алексеев кэриэһигэр хапсаҕайга Саха Өрөспүүбүлүкэтин чөмпүйэнээтэ быйыл киин куоракка, кулун тутар 22-24 күннэригэр ыытыллар. Бу “А” категориялаах күрэс кыттааччытын ахсаанынан уонна тыҥааһыннаах хапсыһыыларынан сураҕырыан сураҕырар.
Дыгын оонньуутугар сүүмэрдиир күрэхтэһии бастакы түһүмэҕэ муус устар 13-14 күннэригэр, иккиһэ – ыам ыйын 25-26 күннэригэр Дьокуускайга буолуоҕа. Быйыл даҕаны ааттаах-суоллаах боотурдары кытта тэҥҥэ хатыһар “саҥа ааттар” тахсыахтарыгар эрэнэбит.
Эр дьон, дьахталлар ортолоругар мас тардыһыытыгар Арассыыйа чөмпүйэнээтэ барыллаан ыам ыйын 24-26 күннэригэр ыытыллыаҕа диэн буолар. Ханна буолара кэлин чопчуланыаҕа.
Сахалыы многоборьеҕа “Дыгын оонньуулара” турнир спорду сэҥээрээччилэри Туймаада Ыһыаҕар мунньуоҕа. Дьэ хайалара сэттэ түһүмэхтээх үбүлүөйдээх XXV күрэс муҥутуур кыайыылааҕынан буолбутун бэс ыйын 29-30 күннэригэр билиэхпит.
Роман ПОПОВ, «Саха сирэ» хаһыат, edersaas.ru
Хаартыска интэриниэттэн ылылынна